Массыына иһиттэн уоруунан дьарыктаммыт эр киһини туттулар

Сэтинньигэ уонна ахсынньыга Дьокуускай куорат үс олохтооҕуттан ИДьМ «Дьокуускайдааҕы» управлениетын 2-с №-дээх полициятын отделыгар уоруу туһунан сайабылыанньалар киирбиттэр. Бары түгэҥҥэ биллибэт киһи дьон массыыналарын түннүктэрин алдьатан, салон иһигэр киирэн, тус малларын уоран барар эбит.

Суһал-көрдүүр тэрээһиннэрин кэмигэр полиция үлэһиттэрэ уорууну түһэрбит видеокамералар устууларын үөрэтэн, уорбаланааччыны быһаарбыттар. ИДьМ «Дьокуускайдааҕы» управлениетын холуобунай ирдэбил отделын үлэһиттэрэ урут сууттаммыт 45 саастаах эр киһини туппуттар.

Силиэстийэҕэ быһаарыллыбытынан, уорбаланааччы киэһэ элбэх кыбартыыралаах дьиэлэр тастарыгар турар массыыналары кэтээн көрөр эбит. Ол кэннэ тааһынан түннүктэрин үлтү сынньан, салон иһигэр сыаналаах мал көрдүү киирэрэ быһаарыллыбыт. Икки түгэҥҥэ суумкалары уорбут, ол иһигэр докумуоннар эрэ бааллар эбит, ону кэлин бырахпыт. Үһүс түбэлтэҕэ харчылаах суумканы уоран барбыт. РФ Холуобунай кодексатын 158-с ыстатыйатынан («Уоруу») холуобунай дьыалалар тэриллибиттэр. Буруйданааччыга ханна да барбат  илии баттааһыннаах хааччахтыыр миэрэ ылыллыбыт, диэн ИДьМ пресс-сулууспата иһитиннэрэр.