Массыынанан киһини түҥнэри көтөн баран куоппут…

Бэҕэһээ, бэс ыйын 29 күнүгэр, Дьокуускай куоракка киһи өлүүлээх суол быһылаана таҕыста.

Сарсыарда 11 чаас саҕана  Госавтоинспекция дьуһуурунай чааһыгар Хатыҥ Үрэхтиир шоссе уонна Бүлүүлүүр суол быһа охсуһууларыгар сатыы дьон туорааһыныгар киһини түҥнэри көппүттэрин туһунан иһитиннэрии киирбит.

Барыллааһын быһыытынан, 60 саастаах дьахтар күөх уот холбоммутугар суолу туораан истэҕинэ массыынанан түҥнэри көппүттэр.   Ол түмүгэр дьахтар улаханнык эмсэҕэлээн тыына быстыбыт.

Дьахтары түҥнэри көппүт суоппар быһылаан тахсыбыт сириттэн куоппут. Ол да буоллар массыына суоппара ким буоларын быһаарбыттар. Билигин туһааннаах быһылаанынан силиэстийэлиир уорганнар үлэлииллэрин туһунан Госавтоинспекция иһитиннэрдэ.