Массыынаны күрэтэн барбыт киһиэхэ холуобунай дьыала көбүтүлүннэ

Алдан оройуонугар  «Жигули» массыынаны күрэтэн барбыт 21 саастаах ханна да үлэлээбэт олохтоох эр киһиэхэ холуобунай дьыала тэрилиннэ.

Ол курдук эдэр киһи биир киэһэ дьиэтигэр арыгылаабыт. Түүн ортото уулуссаҕа тахсыбыт. Онно  ыаллыы олорор  киһитин «Жигулита» турарын көрөн,  массыынанан хатааһылыан  баҕарбыт. Итиэннэ массыына ойоҕос түннүгэ аһаҕас турарыгар хараҕа хатаммыт.  Инньэ гынан түннүгүнэн  илиитин уган ааны  аспыт.

Массыынаны сатаан собуоттаабакка, тиэргэҥҥэ эдэр ыччаттар баалларын көрөн, «Жигулины» анньалларыгар көрдөспүт.  Ол гынан баран массыына син биир собуоттамматах. Онон массыынаны аара суолга хаалларан баран, эр киһи дьиэтигэр төннүбүт.   Кэлин уорбаланааччы ыаллыы олорор киһититтэн бырастыы гынарыгар көрдөспүт.

Массыынаны күрэтэн барыынан ИДьМ Алданнааҕы  отделын сотрудниктара РФ Холуобунай кодексын 166 ыст. 1 чааһынан  холуобунай дьыала тэрийдилэр.