Массыынатыгар 4 кг тахса көмүһү тиэйэн испит Свердловскай уобалас олохтооҕо тутулунна

ИДьМ сулууспатын Силиэстийэлиир управлениетын тэриллиилээх буруйу оҥорууну силиэстийэлиир отдела 48 саастаах Свердловскай уобалас олохтооҕор холуобунай дьыаланы көбүттэ.

Бу киһи күндү металлары сокуону кэһэн эргитиигэ уорбаланар. Уорбаланааччы ыытан иһэр массыынатын ааспыт ыйга «Халыма» федеральнай суол 255-с км Госавтоинспекция уонна ФСБ управлениетын үлэһиттэрэ тохтоппуттар. Тырааныспары көрүү-истии кэмигэр быраабы харыстыыр уорганнар үлэһиттэрэ приборнай панель анныттан кистэлэҥ сири булбуттар. Онтон скотчтыы лиэнтэнэн сууламмыт, цилиндр курдук быһыылаах түөрт тимир мал баар косметика суумкатын ылбыттар. Булуллубут маллары чинчийиигэ ыыппыттар.

Чинчийии түмүгүнэн, бу айылҕа көмүһэ буолара быһаарыллыбыт. Уопсай ыйааһына – түөрт киилэттэн тахса, оттон сыаната – 35 мөл. солк. кэриҥэ. Суоппар тутуллан, салгыы быһаарсарга Дьокуускайга аҕалыллыбыт.

Силиэстийэ быһаарбытынан, кини киин куоракка айаннаан испит уонна эрдэттэн кыбартыыра куортамнаспыт. «РФ Холуобунай кодексатын 191-с ыстатыйатын 5-с чааһынан көрүллүбүт буруйу оҥоруу бэлиэлэринэн көбүтүллүбүт холуобунай дьыала силиэстийэлэнэр кэмигэр, уорбаланааччы дьиэтигэр хаайылынна. Силиэстийэлиирэччилэр уонна оперативниктар көмүһү хантан, кимиэхэ анаан илдьэ испитин быһаарыахтарыгар диэри, кини куортамнаспыт дьиэтиттэн тахсыа суохтаах», – диэн ИДьМ Саха сиринээҕи пресс-сулууспата иһитиннэрэр.