Массыынатын былдьаабыттар. Тоҕо?

Мэҥэ Хаҥалас улууһугар «Тойота-Премио» хаһаайката арыгы иһэн баран, уруулга олорбутун иһин массыынатын былдьаабыттар. Мэҥэ Хаҥалас улууһун борокуратуурата бу Холуобунай дьыалаҕа судаарыстыбаннай буруйдааһыны өйөөбүт.

Онон суоппар дьахтар Арассыыйа Федерациятын Холуобунай кодексатын 264 ыст. 1 чааһынан сууттаммыт. Суут кэмигэр быһаарыллыбытынан, суоппар дьахтар бу иннинэ арыгы иһэн баран, массыына ыытан тутуллан  административнай эппиэтинэскэ тардылла сылдьыбыт. Онон арыгы иһэн баран, иккистээн уруулга олорон суолга кутталлаах быһыыны-майгыны үөскэппит.  Суут быһаарыытынан, дьахтары 200 чаас күһэлэҥ  үлэҕэ анаабыттар уонна икки сыл устата массыына ыытар быраабын быспыттар.

Маны сэргэ, сууттаммыт дьахтартан судаарыстыба дохуотугар  «Тойота-Премио» массыынатын былдьаан ылбыттар. Суут бириигэбэрэ сокуон күүһүгэр киирэ илик.