Мастарыскыай эдэр инбэлииттэри үлэнэн хааччыйар

Үлэ, социальнай сайдыы миниистирэ Елена Волкова «Ситим» үлэ мастарыскыайын үлэтин-хамнаһын билистэ. Бу мастарыскыайга эдэр инбэлииттэр үлэлииллэр, олохтоох оҥорон таһаарыыны сайыннараллар.

Бүгүҥҥү күҥҥэ мастарыскыайга иистэнэр, туойтан оҥорор сыахтар үлэлииллэр, пастиланы уонна хаппыт фрукталары, чэйдэри оҥороллор. Мастарыскыай эдэр, үлэлиир-хамсыыр кыахтаах инбэлиит дьону үлэнэн хааччыйар, хамнастыыр сыаллаах.

Миниистир Елена Волкова үлэһиттэри, маастардары кытта кэпсэттэ, мастарыскыай үлэтин кытта сиһилии билистэ. Кини оҥоһуктар хаачыстыбалара үчүгэйин, маастардар таһымнара үрдүгүн, бу бырайыак социальнай суолталааҕын бэлиэтээтэ.

Бу бородууксуйаларын батарарга мастарыскыай үлэһиттэрэ ахсынньы 23 күнүгэр Москваҕа ВЭБ-РФ корпорация былаһааккатыгар  буолуохтаах Саҥа дьыллааҕы дьаарбаҥкаҕа баран, атыылыахтара.