Түөкүттэр бэлиэ түгэннэри сыыска-буорга түһэрбэттэр

Түөкүттэр бэлиэ түгэннэри, бырааһынньыктары мүччү туппаттар, дьон тугу наадыйарын эндэппэккэ билэллэр. Саҥа сыл бырааһынньыгын иннинэ ордук сытыырхайаллар. Бу күннэргэ төрөппүттэр оҕолоругар бэлэххэ диэн хомуйбут харчыларын албыннаппыттар.

ИДьМ пресс-сулууспата иһитиннэрэринэн, Нерюнгри оройуонун олохтооҕо социальнай ситиминэн Саҥа дьыллааҕы бадаарак сакаастаары түөкүттэргэ түбэспит. 24 саастаах Чульман бөһүөлэгин олохтооҕо, полицияҕа сайабылыанньа суруйбут. Эмсэҕэлээччи быһаарбытынан, уһуйаан бөлөҕөр төрөппүт кэмитиэтигэр баар, оҕолорго Саҥа сыллааҕы бэлэҕи көрдөөһүҥҥэ кини эппиэттээх эбит. “Вконтакте” социальнай ситимҥэ оҕолорго аналлаах бэлэх оҥороллорун туһунан эрэкэлээмэни булбут. Ыйыллыбыт сигэни (ссылка) баттаан, 30 000 сурутааччылаах страницаҕа киирбит, олор кэккэлэригэр кини билэр дьоно эмиэ бааллар эбит. Ол иһин түөкүттэр буолуо диэн туох даҕаны уорбалыыр санаа киирбэтэх. Сөптөөх табаары талан, 22 бэлэҕи (подарок) сакаастаабыт уонна 33 700 солк. ыйыллыбыт төлөпүөн нүөмэригэр ыыппыт.

Табаар сэтинньи 12 күнүгэр тырааныспар хампаанньатынан тиийиэҕэ диэн сакаастааччыны эрэннэрбиттэр эрээри, ыйыллыбыт болдьоҕор бэлэх тиийэн кэлбэтэх, атыыһыт сибээскэ тахсыбат буолбут. Кыыс атыыһыт төлөпүөнүн нүөмэрин сыһыарыыга бэрэбиэркэлээбитэ, тустаах нүөмэр түөкүттэргэ сурулла сылдьар үһү.

Манна даҕатан эттэххэ, ааспыт сылларга Саҥа сыллааҕы бырааһынньыкка бэлэх сакаастаан ылаары элбэх киһи албыннаппыта иһиллэр. Бэлэҕи эрэллээх эрэ саайтар нөҥүө уонна эрэллээх эрэ атыыһыттартан атыылаһыҥ диэн сүбэлииллэр.