Матасыыкыллаах киһи сылгыны кытта харсыспыт

Өлүөхүмэ улууһугар 44 саастаах эр киһи матасыыкылынан айаннаан иһэн сылгыны кытта харсыспыт. Ол түмүгэр суоппар араас эчэйиилэри ылбыт диэн Госавтоинспекция иһитиннэрэр.

Суол саахала балаҕан ыйын 12 күнүгэр Өлүөхүмэ куоратын аттыгар буолбут. Ол туһунан полиция дьуһуурунай чааһыгар экстреннай сулууспа диспетчерэ иһитиннэрбит.

ГАИ үлэһиттэрэ быһаарбыттарынан, эр киһи Regulmoto матасыыкыла регистрацията суох эбит. Ону ааһан тырааныспары ыытар бырааба эмиэ суох эбит, саахал кэмигэр мотошлему кэппэтэх.

Матасыыкыл саахал кэмигэр түҥнэстибит. Суоппар уҥа атаҕын эчэппит. Оттон сылгы эмсэҕэлээбэтэх.