“Матера, бырастыы…”

Валентин Распутин айымньылара хаһан баҕарар, хайа баҕарар киһи дууһатын кылын таарыйаллар. Ханна эрэ, түгэххэ түһэн, саһан хаалбыт иэйиилэргин уһугуннараллар…

Кини “Прощание с Матерой” сэһэнинэн — “Матера, бырастыы…” испэктээк премьерата Саха тыйаатырыгар (Андрей Борисов инсценировката, туруоруута) улахан ситиһиилээхтик ааспыта. Степанида Борисова үбүлүөйдээх күннэригэр анаммыт испэктээктэргэ кыайан сылдьыбакка гынан баран, бу ыам ыйдааҕа репертуарга киирбит “Матера, бырастыы…” (Мария Докторова тылбааһа) испэктээги иккис састаап толоруутугар көрдүм, олус сөбүлээтим. Дьон бары долгуйан, астынан, түмүккэ, сценаҕа тахсыбыт артыыстарга, сүһүөхпүтүгэр туран ытыс таһынныбыт.

Биһиги Сахабыт тыйаатырын артыыстара, чахчы да, бары чаҕылхайдар! Эдэр щепкинецтэр, бу өттүнэн, дьэ, табыллыбыттар – холобур буолар дьонноро сэргэстэһэ хаамса сылдьаллар… Мин бүгүн бу испэктээк туһунан ырытан суруйбаппын, ис хоһоонун, туруорар сытыы проблемаларын бары билэҕит, онон көннөрү, биһиги дьолбутугар төрөөбүт талааннаах артыыстарбытыгар, көрөөччүлэр ааттарыттан, үчүгэй оонньууларын иһин өссө төгүл махталбын тиэрдиэхпин баҕарабын: СӨ үтүөлээх артыыската Надежда Ушницкаяҕа – Распутин Даарыйатын уобараһын олус истиҥник-итэҕэтиилээхтик, толору арыйда; СӨ норуодунай артыыската Лена Сергееваҕа-Румянцеваҕа (Сиимэ) – кини хайа баҕарар оруолу кыайа-хото тутар кыахтаах; СӨ үтүөлээх артыыската Елизавета Потаповаҕа – Настаа оруола киниэхэ анаммыт курдук… ; СӨ үтүөлээх артыыската Зоя Поповаҕа (Кэтириис) махтанабыт; СӨ үтүөлээх артыыската Ирина Нифороваҕа (Вера) махтал – олус истиҥ толоруу; Елена Яковлеваҕа-Марковаҕа (Тунгуска), СӨ үтүөлээх артыыската Ильяна Павловаҕа (Клавка) – испэктээк программкатыгар бу икки кыыс ааттарын көрдөххүнэ, тута сэргэс гына түһэҕин; СӨ норуодунай артыыһа Петр Баснаевка (Дьөгүөр Карпов), СӨ үтүөлээх артыыһа Айаал Аммосовка (Байбал), СӨ норуодунай артыыһа Куприян Михайловка (Жук), артыыс Альберт Семеновка (Воронцов), СӨ үтүөлээх артыыһа Кирилл Семеновка (Махсыым) махтанабыт; СӨ норуодунай артыыһа Герасим Васильевка – кини сценаҕа, көннөрү, саҥарбакка да сырыттаҕына – бэйэтэ дириҥ уобарас!; артыыс Павел Ченяновка (Боҕодуол) уонна Ньукууска (Сиимэ сиэнэ) оруолун дьоһуннаахтык толорбут оҕоҕо, итиэннэ Василий Романовка (Өндөрөй), Нарыйа Колесоваҕа (Мила), Эдуард Захаровка (Бөтүүкэ), уо.д.а. артыыстарга барыгытыгар махтанабыт.

Испэктээккэ биир оҥочо баар. Өбүгэлэриттэн тутан хаалбыт Тунгуска эргэ оҥочото. Оҕобутун Ньукуусканы бу оҥочо быыһаата…

Татьяна МАРКОВА