Матрена Евсеева: «Сүлэ олохтоохторун көмөлөрө уҕараабат»

Ньурба улууһун Сүлэ нэһилиэгэ Ньурба куоратыттан 6 км чугас олорор. 450-ча киһи олохсуйан олорор түөлбэтиттэн, атын улуустарга олорооччулары киллэрэн туран, барыта 9 уол байыаннай эпэрээссийэҕэ барбыта, бу уоллатарга уонна кинилэр дьиэ кэргэттэригэр бука бары биир санаанан көмөлөһө, өйөһө олоробут диэн нэһилиэк дьахталларын Сэбиэтин бэрэссэдээтэлэ Матрена Евсеева кэпсиир.

— Ааспыт сыл алтынньытыттан нэһилиэк дьахталларын Сэбиэтин бэрэссэдээтэлинэн талыллан үлэлиибин. Сэбиэппитигэр 15 көхтөөх чилиэннээхпин. Кинилэрдиин күүспүтүн түмэммит күһүҥҥүттэн ыла саллааттарга таҥас тигиитигэр, гуманитарнай көмөнү тэрийиигэ, ону хомуйан, түмэн ыытыыга, кинилэр дьиэ кэргэттэригэр нэһилиэк уопсастыбаннаһа, олохтоохторо көмөлөһүүлэригэр биир санаанан баччаҕа диэри үлэлии олоробут. Сүлэҕэ олорон ыҥырыллыбыт алта оҕо байыаннай сулууспаҕа сылдьар, үс уол атын улуустан ыҥырыллан барбыттара. Олортон биир оҕобут көҥүл өттүнэн иккитэ баран кэллэ. Билигин “Анаабыр Алмаастарыгар” үлэлии сылдьар.

Бу буойуттарбыт дьиэ кэргэттэригэр көмөбүт диэн мастарын-муустарын хааччыйыы, туох кыһалҕа баарынан сайаапка, этии киирдэҕинэ, көмөлөһө, өйүү олоробут. Олохтоох ас-үөл бородууктатынан спонсордатаммыт, «Байар” ТХПК-тан этинэн, көтөр фабрикатыттан сымыытынан уо.д.а. кими да көтүппэккэ биэрэн-тиэрдэн, бу күһүн хааччыйбыппыт. Икки буойуммут дьиэ кэргэнигэр нэһилиэк, улуус дьаһалталарын көмөтүнэн уоттан тэн холботон, бу кыһын этэҥҥэ сылаастык кыстаатылар.

Уоппускаларыгар икки нэдиэлэҕэ 14 хонукка сынньана кэлбит икки уолбутун бу күннэргэ атаардыбыт. Кинилэр уоппускаҕа кэлэн истэхтэринэ биһиги аара суолга утары баран, үөрүүлээх быһыыга-майгыга көрсүбүппүт умнуллубат. Барахсаттар дойдуларыгар кэлэн сылааларын таһааран, дуоһуйа сынньаннылар, доруобуйалара этэҥҥэ. Ааспыт субуотаҕа кэлэн кэпсэтэ сылдьыбыттарыгар биһиги кинилэргэ туох наадатын ыйыталастыбыт, биэрээри бэлэмнээбит таҥастарын, малларын туттардыбыт. Маннык түгэннэргэ Сүлэ нэһилиэгин дьоно Ийэ, Аҕа түмсүүлэрэ бука бары бииргэ сомоҕолоһоммут кимиэхэ туох кыһалҕалаахтарын, туох үчүгэй-мөкү баарын барытын ыйыталаһаммыт, дьоммутун көрө-истэ, билсэ, сүүс бырыһыан көмөлөһө, кэпсэтиһэ олоробут.

Уолаттар биһиги бардахпытына, атын уолаттарбыт уоппускаҕа кэлиэхтэрин наада диэннэр, барабыт диэбиттэрэ. Онон эмиэ аттаннылар. Этэҥҥэ эргиллэн кэллиннэр диэн бүтүн нэһилиэгинэн алгыы хааллыбыт.

Ааспыт сыл олунньуттан Ньурба улууһугар «Көмүскэл» диэн гуманитарнай көмө боппуруостарыгар уопсастыбаннай түмсүү тэриллибитэ. Наада буоллаҕына, онно киирэн эмиэ үлэлиибит. Онон бу курдук, үлэлэрбитин аттарсан, спонсор көмөтүн хомуйсан, ыалларбытыгар көмөлөһөн, саллааттарбытыгар таҥас тигэн уо.д.а. үлэлии-хамсыы сылдьабыт. Үчүгэйэ диэн маннык көмөлөһүүнү нэһилиэнньэ өйүүр. Таҥас тигэн ыытыыга бэйэбит эрэ оҕолорбутугар диэн буолбакка, Саха сириттэн байыаннай эпэрээссийэҕэ барбыт уолаттарбытыгар барыларыгар тигистин диэн тиэрдэн, ыытан олоробут. Улууспутуттан байыаннай эпэрээссийэҕэ сылдьар уолаттарбыт тустарынан хаартыскалаах альбому оҥорторо сылдьабыт, биир уолбут сайын от ыйыгар кэлиэхтээх, ону кэтэһэбит.

Тус бэйэм бу үлэлэри иилэһэ-саҕалаһа сылдьар киһи буоларбынан спонсорскай көмөҕө элбэхтэ кыттабын. Ньурба улууһун “Байар” ТХПК-тын салайааччытыгар Филиппова Надежда Геннадьевнаҕа, Сүлэҕэ тыа хаһаайыстыбатыгар ИП-лаах урбаанньыт Филиппова Валентина Прокопьевнаҕа, олохтоох Николаева Саргылана Васильевнаҕа утумнаахтык көмөлөһө, өйүү олорууларын иһин уонна Сүлэ олохтоохторун уҕараабат көмөлөрүгэр барҕа махталбын тиэрдэбин!