Маттаҕа икки киилэлээх хортуоппуй хостонон соһутта

«Күһүҥҥү киһи — күлбүтүнэн» диэн бэргэн этии араас ис хоһоонноох. 

Күһүҥҥү хомуурга араас көстүүлээх оҕуруот аһа (моркуоп, хортуоппуй, помидор уо.да.) көстөн, киһини күллэрэрэ баар суол. Өлгөм үүнүүнү ылан, үөрүүгүттэн мичээриҥ — эмиэ «күһүҥҥү киһи күлбүтүнэн». Оттон икки киилэлээх биир хортуоппуйу хостоотоххуна — икки бүк үөрүү!

Мэҥэ Хаҥалас улууһун дьаһалтатын пресс-сулууспата иһитиннэрбитинэн, быйыл 24 см уһуннаах, 13 см кэтиттээх, 2 киилэ ыйааһыннаах хортуоппуй Матта сэлиэнньэтигэр Кычкиннар дьиэ кэргэҥҥэ үүммүт. Кинилэр икки бааһыналарыттан 25 куулу ылбыттар.
Саамай улахан хортуоппуйу 4-с кылаас үөрэнээччитэ Емелияна Ильина оскуола күһүҥҥү быыстапка-дьаарбаҥкатыгар илдьэн, тэрээһин кыттыылаахтарын сөхтөрбүт.

Бу күннэргэ улуус, нэһилиэк аайы күһүҥҥү быыстапка-дьаарбаҥкалар ыытыллан эрэллэр. Мэҥэ Хаҥалас Маттатын 2 киилэлээх хортуоппуйун ким эмэ куоһарыа дуо?