Матвиенко үлэлээбэт дьонтон ОМС-ка сылга 45 тыһ. солк. хомуйар туһунан этии киллэрдэ

Арассыыйаҕа, официальнай дааннайдарынан, мөлүйүөнүнэн үлэлээбэт эрээри үлэлиир кыахтаах гражданнар бааллар. Кинилэр мэдиссиинэнэн хааччыллыыларын иһин официальнайдык үлэлиир дьон төлүүллэр — бу быһаарыллар кэмэ кэлбит кыһалҕа.

Ол  туһунан Федерация Сэбиэтин бэрэссэдээтэлэ Валентина Матвиенко эрэгийиэннэр балааталарыгар «2026 сылга уонна 2027, 2028 сыллардааҕы былааннанар кэмҥэ федеральнай бүддьүөт бырайыагын параметрдарыгар» аналлаах парламенскай истиилэргэ тыл этэригэр иһитиннэрдэ.

Дьүүллэһии кэмигэр Матвиенко судаарыстыба ороскуотун олохтоохтук дьаһайар биир ньыманы эттэ. Кини этэринэн, үлэлээбэт, ол эрээри үлэлиир кыахтаах гражданнары мэдиссиинискэй страхование иһин сыллааҕы усунуоһу төлүүргэ эбээһинэстээтэххэ ситиһиэххэ сөп. Дойду үрдүнэн ортотунан үлэ биэрээччилэр биир үлэһит иһин Булгуччулаах мэдиссиинискэй страхование (ОМС) пуондатыгар сылга 45 тыһыынча кэриҥэ солкуобайы төлүүллэр.

Официальнай дааннайдарынан, Москваҕа 700 тыһыынча кэриҥэ үлэлээбэт дьон баар. Кинилэр сыл иһигэр 45 тыһ. солк. үлэлээн булар кыахтаахтар, «бу сүҥкэн элбэх харчы буолбатах» диир Матвиенко. Итиэннэ спикер бу дьон-сэргэ сөбүлээбэт быһаарыытын иһин кини бэйэтэ медиаҕа кириитикэҕэ түбэһиэҕин быһаарда. Онон сибээстээн Матвиенко «биһиги хаһан даҕаны нэһилиэнньэҕэ хоромньулаах, толкуйдамматах быһаарыныылары ылыммаппыт» диэн эрэннэрдэ.

«Биһиги маннык балаһыанньаҕа хайдах сөпкө дьаһанарбытын чуолкайдыахтаахпыт. Мантан айдааннаах сенсация оҥорор сатаммат — бу быһаарыллар кэмэ сиппит, ааспыт кэмтэн кэлбит кыһалҕа. Бырабыыталыстыбаҕа бииргэ үлэлиир дьоммутун кытта кэпсэтиини салгыахпыт», – диэн Федерация Сэбиэтин спикерэ түмүктээтэ.