«MAX» мессенджер бета-көрүҥүн тургутуута түмүктэнэр

Национальнай «MAX» мессенджер бета-көрүҥүн тургутуута түмүктэнэн эрэр. Платформа чопчу хаһан официальнайдык үлэтин саҕалыыра билиннэ. Национальнай «MAX» мессенджер официальнай үлэҕэ киириитэ күһүн саҕаланыытыгар былааннанар диэн VK Экэниэмикэҕэ уонна үпкэ-харчыга вице-бэрэсидьиэнэ Александр Морозов иһитиннэрдэ. Бу туһунан РИА Новости суруйар.

«Күһүн саҕаланыытыгар сыһыарыыны официальнайдык үлэҕэ киллэрэр уонна платформаны сиһилии билиһиннэрэр былааннаахпыт», — диэтэ кини хампаанньа сыл бастакы аҥаарын сыллааҕы үлэтин түмүгүнэн ыытыллыбыт кэпсэтии кэмигэр.

Сааc VK хампаанньа «MAX» бета-көрүҥүн дьон-сэргэ туһаныытыгар таһаарбыта. Интэриниэт туһанааччылар мессенджер нөҥүө кэпсэтиэхтэрин, эрийиэхтэрин, ону тэҥэ  иһитиннэриилэри уонна түөрт гигабайтка диэри кээмэйдээх файллары ыытыахтарын сөп.

Билиҥҥи туругунан, сыыппаралаах платформаны App Store-тан, RuStore-тан уонна Google Play-тан хачайдыахха сөп. Билигин даҕаны национальнай мессенджер туһанааччылара ханаалларга сурутуохтарын, публикацияларга реакция туруоруохтарын, постар тустарынан биллэриилэри туруорунуохтарын, ону сэргэ интэриэһиргэтэр ханаалларын чааттар испииһэктэригэр сыһыарыахтарын уонна араас паапкаларынан наардыахтарын сөп.

Ону таһынан, сотору кэминэн «MAX» мессенджергэ «Госуслуги» портаалга холбонор кыах үөскүөҕэ. Платформаны киһи тус дааннайын пааспары уонна уопсайынан кумааҕы докумуоннары туһаммакка эрэ бигэргэтэргэ кыах биэрэр сыыппаралаах идентификатор систиэмэтинэн хааччыйыахтара.

Итини сэргэ, мессенджери оҥорооччу «MAX»-ка электроннай илии баттааһын функциятын уонна үөрэх сервистэрин киллэрэр былааннаах.

Санатан эттэххэ, Судаарыстыбаннай Дуума бэрэссэдээтэлэ Вячеслав Володин «MAX» мессенджергэ регистрацияламмыта уонна бэйэтин ханаалын арыммыта. Володин платформа үлэтин үрдүк хаачыстыбатын бэлиэтээбитэ.

Ону тэҥэ Москва мэрэ Сергей Собянин «MAX»-ка нуучча судаарыстыбатын киин куоратын официальнай ханааллара үлэлиэҕин туһунан биллэрбитэ.

Саҥа «MAX» мессенджер интэриниэт туһанааччыларын ортотугар түргэнник биһирэбили ылан эрэр. Билигин Москва ыалдьыттара уонна олохтоохторо куорат олоҕун уонна сайдыытын туһунан саамай сытыы информацияны бастакынан билэр кыахтаннылар.

Урут этиллибитин курдук, МАХ мессенджер «Госуслуги» платформатыгар киирэргэ ФСБ-ны кытта куттал суох буолуутун ирдэбиллэрин ааспыта. Бу туһунан РФ Сыыппара сайдыытын миниистирэ Максут Шадаев иһитиннэрбитэ. Ону таһынан, РФ Генеральнай борокуратуурата «MAX»-ка ханаал арыйбыта.

Бэлиэтиир буоллахха, национальнай мессенджери туһанааччылар ахсааннара икки мөлүйүөнтэн таҕыста.

Max Саха сиригэр кэллэ