MAX — куттала суох кэпсэтиигэ саҥа платформа

Кэлиҥҥи ыйдарга дойду үрдүнэн киэҥник тарҕаммыт омук мессенджердэрин нөҥүө түөкүннээһин ахсаана үксээбитэ бэлиэтэнэр. Ордук WhatsApp* мөкү өттүнэн аатырар, бу мессенджери Meta* хампаанньа хонтуруоллуур (РФ-ҕа экстремистскай тэрилтэнэн билиниллибит).

Эспиэртэр этэллэринэн, спам-ыытыылар, фишинг-сигэлэр уонна түөкүннүүр ньымалар үксүлэрэ бу мессенджер нөҥүө тарҕаналлар. Төрүөтэ – көмүскэлэ мөлтөҕөр уонна туһанааччылары дьиҥнээхтик бэрэбиэркэлээбэттэригэр сытар: ханнык баҕарар төлөпүөн нүөмэринэн регистрацияланыахха сөп, бу аан дойду үрдүнэн баар хара санаалаахтарга киэҥ кыаҕы арыйар.

Бу кэнниттэн MAX диэн саҥа дойду мессенджерэ үлэҕэ киириитэ олохтоохторго сыыппараэйгэтигэр куттала суох буолууларын хааччыйыыга оҥоһуллубут хардыы быһыытынан көрүллэр. Платформа сүрүн уратыта – булгуччулаах верификацияҕа сытар: MAX-ка Арассыыйа эбэтэр Беларусь пааспарынан уонна төлөпүөнүнэн эрэ регистрацияланыахха сөп. Дааннайдар бары дойду эрэ сервердэригэр хараллаллар, онон атын дойдулар туһаналлара тохтотуллар. Ити курдук, түөкүннээччилэргэ улахан мэһэй үөскүүр: аата-суола биллибэккэ регистрацияланар кыах суох, оттон туһанааччы информациятыгар киирии дойду сокуонунан салайыллар.

MAX мессенджери VK хампаанньа РФ Сыыппара сайдыытын министиэристибэтин уонна «Ростех» экосистематын тэрилтэлэрин өйөбүллэринэн оҥорбут. Сыһыарыы iOS, Android, Windows, macOS курдук бары киэҥник тарҕаммыт платформаларга, ону таһынан веб-версиянан таҕыста. Туһанааччылар тиэкиһинэн уонна куолаһынан кэпсэтэр чааттарынан, аудио- уонна видео-эрийиилэринэн, 4 ГБ диэри кээмэйдээх файллары ыытыынан, Түргэн төлөбүр ситиминэн (СБП) харчыны көһөрүүнэн уонна GigaChat-ка олоҕурбут чат-ботунан номнуо туһаныахтарын сөп. Баан өҥөлөрүн кытта табыгастаахтык дьүөрэлэһиитэ  MAX-ы кэпсэтиигэ эрэ буолбакка, үп-харчы операцияларыгар эмиэ туһалаах оҥорор.

Оҥорооччулар бэлиэтииллэринэн, чугастааҕы саҥардыылар кэннилэриттэн платформа өссө киэҥ кыамталаах буолуоҕа. Судаарыстыба өҥөлөрүн киллэрэр былааннаахтар – «Госуслуги» портаалы кытта холбооһун, сыыппара ID, ону тэҥэ электроннай илии баттааһын. Бу мессенджери былаас уорганнарын кытта официальнайдык алтыһарга, өҥөлөргө төлүүргэ, оттон инникитин пааспар эбэтэр мэдиссиинэ полиһын курдук үгэс буолбут докумуоннары QR-кодунан солбуйарга кыах биэриэҕэ.

Сыһыарыыны RuStore, Google Play, AppGallery, AppStore-тан, ону таһынан оҥорооччу официальнай саайтыттан хачайдыахха сөп. Регистрацияҕа төлөпүөн нүөмэрэ уонна СМС-нан бигэргэтии эрэ наада, оттон араспаанньаны баҕа өттүнэн суруйуохха сөп.