MAX мессенджер туттарга судургу, өйдөнүмтүө уонна куттал суох буолуутун хааччыйар

МАХ сыыппара платформата Арассыыйаҕа хото киирэн эрэр. МАХ мессенджеринэн киһи дэбигис аудионан уонна видеонан, чааттарынан кэпсэтэр кыахтаах. Ону таһынан дьыалабыай дьоҥҥо аналлаах атын даҕаны сервистэрдээх. Онон туһанааччылар күннээҕи соруктарын быһаарарга кыах биэриллэр.

Үөһээ Бүлүү улууһун баһылыга Валерий Николаев саҥа мессенджер атыттардааҕар ордугун уонна куттал суох буолуутун хааччыйарын бэлиэтиир:

— Интэриниэт ситимин нөҥүө сонун үллэстэр, чугас дьоммутун кытта кэпсэтэр, санаа атастаһар, ону таһынан үлэ боппуруостарын быһаарарсар саҥа национальнай мессенджердэннибит. Ол курдук, Кытайга Wechat, Японияҕа Line, Соҕуруу Кореяҕа KakaoTalk, Вьетнамҥа Zalo, Индияҕа Sandes, онтон Арассыыйаҕа MAX диэн сыһыарыы үлэҕэ киирдэ. Үйэбит тэтиминэн саҥа технологиялар түргэнник сайдан иһэр буоланнар, билигин аан дойду үрдүнэн сыыппара хайысхатын дойду иһигэр хааччыйар туһугар үлэ ыытыллар. Биһиги Арассыыйаҕа тас омук дойдута оҥорбут мессенджердарынан, социальнай ситимнэринэн өр кэмҥэ тутта үөрэммиппит төрүөтүгэр, тас дойдуттан киирэр дьайыылартан элбэх киһи эмсэҕэлээбит буолуохтаах. Дьону албынныыр интэриниэт ситимин түөкүттэрэ, оҕолор өйдөрүн баайан куһаҕан суолга угуйар террористар, арҕаа дойдулар сыаннастарын иҥэрэр нууччалыы эттэххэ «нетрадиционнай» көрүүлээх дьон, дойду конституционнай тутулун утарар сепаратистар хонтуруола суохтук төлөпүөммүтүгэр кутуллан чахчы кутталы үөскэтэллэр. Билигин Арассыыйа бэйэтин мессенджерэ Макс баар буолан, биһиги оҕолорбут уонна бэйэбит төлөпүөммүтүгэр куттал суох буолуутун хааччыйар. MAX мессенджер туттарга судургу, өйдөнүмтүө уонна саамай сүрүнэ куттала суох. Үөһээ Бүлүү улууһун дьаһалтата, тэрилтэлэрэ бары 100% MAX сыһыарыыга көһөн үлэбитин салгыыбыт.