«Max»-тан дааннайдар уоруллубуттарын туһунан сымыйа сурах тарҕанна

«Max» национальнай платформаны алдьаппыттарын туһунан сымыйа сурах тарҕанна диэн сервис пресс-сулууспата РИА Новостига иһитиннэрдэ.

Бу иннинэ Telegram-ханааллар нацплатформаны хакердар алдьаппыттарын туһунан иһитиннэриини тарҕаппыттара. Ол суруйууларга 15 мөлүйүөнтэн тахса туһанааччы тус дааннайдара тарҕаммыттар, ол иһигэр Судаарыстыбаннай Дуума дьокутаата Николай Брыкин дааннайдара кытта баара диэн суруйбуттара. Max пресс-сулууспата маннык иһитиннэриилэр олуона суоҕун бэлиэтээтэ.

«Аата биллибэт источниктан кэлбит иһитиннэрии – сымыйа сурах (фейк)… Max туһанааччыларын дааннайдара эрэллээхтик харыстаналлар», — диэн хампаанньа эрэннэрдэ.
Ону тэҥэ, платформа Amazon (AWS) курдук омук сирин сервистэрин туһамматын чуолкайдаатылар: информация Арассыыйаҕа баар сервердарыгар эрэ хараллар. Мессенджер Bcrypt диэн пароль хэшированиятын ньыматын туттубат. Маны таһынан, Max BugBounty бырагырааматын чэрчитинэн ити тиэмэҕэ биир да иһитиннэрии киирбэтэҕэ.

Хампаанньаҕа эбэн эппиттэринэн, платформаҕа туһанааччылар олорор сирдэрин, төрөөбүт күннэрин-дьылларын, электроннай буосталарын аадырыһын, ону тэҥэ ИНН эбэтэр СНИЛС курдук дааннайдар хараллыбаттар. Ону тэҥэ Max-ка username диэн суох, тоҕо диэтэххэ сервис туһанааччылары наардыыр тиһиги туһаммат.
«Max» пресс-сулууспатын хаартыската