«Мечтай! Действуй! Побеждай!»: «Абилимпикс» түмүктүүр түһүмэҕэр кыттыахтара

 Москваҕа «Гостиный двор» быыстапкалыыр киинигэр алтынньы 26-29 күннэригэр «Абилимпикс» чөмпүйэнээт түмүктүүр түһүмэҕэ ыытыллар.

Чөмпүйэнээт «Үөрэх» национальнай бырайыак сыалынан-соругунан,  «Профессионалитет» федеральнай бырайыак көмөтүнэн олоххо киллэриллэр. Быйылгы чөмпүйэнээт «Мечтай! Действуй! Побеждай!» девиһинэн ыытыллар.

Манна түөрт конкурсант түөрт компетенциянан кыттар. Ол курдук, «Ресторанный сервис» компетенцияҕа «Школьники» категориятыгар Аина Охлопкова (саҥаралларыгар кэһиллиилээх оҕолору үөрэтэр өрөспүүбүлүкэтээҕи анал (коррекционнай) оскуола-интэринээт); «Информационная безопасность» «Специалисты» категориятыгар Владислав Максимов, М.К.Аммосов аатынан ХИФУ, инфраструктурнай технологияларга кэллиэһин устудьуона; «Визаж» «Студенты» категорияҕа Йанка Дунаева, В.А.Вонгродскай аатынан мэдиссиинэ кэллиэһин устудьуона; «Ногтевой сервис» «Специалисты» — Ирина Аммосова. Маны сэргэ, национальнай чөмпүйэнээт иитинэн устудьуоннар — Дьокуускайдааҕы мэдиссиинэ кэллиэһиттэн Елизавета Шерстянникова, Мичийэ Турантаева, Амина Иванова, Мичийэ Кюдякова, Эдуард Романенко уонна Алена Рафаилова «Помощник фельдшера малонаселенных пунктов» кытталлар. Чөмпүйэнээт «Медицинский и социальный уход соревнований» компетенциятыгар сыаналыыр эспиэртэргэ Дьокуускайдааҕы мэдиссиинэ кэллиэһин преподавателэ  Фаина Семёновна Филиппова киирдэ.

«2024 сылга «Абилимпикс» хамсааһын 10 сыла. Бу Арассыыйаҕа инклюзивнай үөрэхтээһин устуоруйатыгар суолталаах. Ааспыт сыллар усталарыгар чөмпүйэнээт доруобуйаларыгар хааччахтаах дьоҥҥо күрэхтэһиинэн эрэ буолбакка, идэҕэ дьиҥ сирдээччинэн буолла. Чөмпүйэнээт РФ Бэрэсидьиэнэ В.Путин туруорбут сыалыгар-соругар сөп түбэһиннэрэн, дьоҕурдарын сайыннаралларыгар оскуола үөрэнээччилэригэр, устудьуоннарга, исписэлиистэргэ көмөлөһөр. Уон сыл устатыгар бары түһүмэхтэргэ чөмпүйэнээт кыттыылаахтарынан 120 тыһ. тахса киһи буолла. Маныаха үлэнэн хааччыллыы көрдөрүүтэ ордук улахана киэн туттуунан буолар:  93% үлэнэн хааччылыннылар, ол иһигэр үөрэнэ сылдьааччылар эмиэ«, — диэн этэр РФ Бырабыыталыстыбатын Бэрэссэдээтэлин солбуйааччы Дмитрий Чернышенко.

Бүгүҥҥү күҥҥэ чөмпүйэнээт дойду 89 эрэгийиэнин хабар. Компетенцияларынан күрэстэһии уон сылга сэттэ төгүл улааппыт — 29-тан 206 диэри. Бары таһымҥа хамсааһын партнердарынан 2,5 тыһ. кэриҥэ тэрилтэ буолбут, бары сүрүн быһаарыылар инбэлииттэр уопсастыбаннай тэрилтэлэрэ кыттыылаах быһаарыллаллар.

«Абилимпикс» чөмпүйэнээтэ икки сүрүн түһүмэхтээх. Быйыл эрэгийиэн түһүмэхтэрэ кулун тутартан бэс ыйыгар диэри РФ 89 субъегар ыытылыннылар. 206 компетенцияҕа 25 тыһыынчаттан тахса киһи илин-кэлин түһүстэ. Итинтэн уонтан тахса тыһыынчата бастакы, иккис группалаах инбэлииттэр. Бэлиэтээн эттэххэ, быйыл ДНӨ, ЛНӨ, Херсон уонна Запорожье уобаластара аан бастаан үөрэх тэрилтэлэрин баазаларыгар эрэгийиэннээҕи чөмпүйэнээти ыыттылар. Бары тэрийээччилэргэ үлэлэрин иһин махтанабын«, — диир РФ үөрэх миниистирэ  Сергей Кравцов.

Национальнай чөмпүйэнээт түмүгэ үгэс курдук Москваҕа ыытыллар. Арассыыйа бары эрэгийиэниттэн тыһыынчаттан тахса киһи мэтээл уонна бэйэтин компетенциятыгар бастыҥ буолар күрэхтэһэн иһин илин-кэлин түсүһүөхтэрэ.

Быйыл чөмпүйэнээт түмүктүүр түһүмэҕэр 12 тыһыынчаттан тахса киһи сылдьыаҕа. Чөмпүйэнээт ыалдьыттарын араас тэрээһиннэр, маастар-кылаастар күүтэллэр.

«Абилимпикс» официальнай саайта https://abilympics-russia.ru/