Меценат-атыыһыт сыдьааннара түмсэллэр

2026  сылга үктэнээт, тохсунньу саҥатыгар, Дьокуускай куоракка 1-кы гильдиялаах меценат-атыыһыт Ньукулай Кырбаһааҥкын сыдьааннара түмсэн, ааспыт сыл түмүгүн таһаардылар, быйылгы үлэ былаанын торумнаатылар.

Өймөкөөн улууһун ытык киһитэ Ньукулай Кырбаһааҥкын хаан-уруу аймахтара 2023 сыллаахха Өймөкөөҥҥө ыытыллыбыт Олоҥхо ыһыаҕар улуус нэһилиэктэриттэн, өрөспүүбүлүкэ араас улуустарыттан, Арассыыйа эрэгийиэннэриттэн кэлэн, Н.О. Кривошапкин мусуой-балаҕаныгар көрсүбүттэрэ. Ол кэннэ  аймахтары  түмэр соруктаах социальнай ситимҥэ анал бөлөҕү аспыттара уонна халыҥ аймах сыдьааннары сомоҕолуур түмсүү тэринэн, дириҥ ис хоһоонноох үлэни ыытарга соруммуттара. Ааспыт сыл күһүнүгэр «Якутск купеческий» 3-с пуорумҥа көхтөөх кыттыыны ылбыттара.

Аймахтар көрсүһүүлэригэр Николай Кривошапкин-Ньургул сыдьаана, педагог Мира Томская 2023 сыллаахха, оччолорго 8-с кылаас үөрэнээччитэ, быйыл оскуоланы бүтэрэр Кристина Неустроева научнай салайааччылара, учууталлара Яна Попованы уонна Мира Томскаяны кытта оҥорбут төрүччүлэринэн «Инникигэ хардыы» научнай-практическай кэмпириэнсийэҕэ кыттыбыт үлэтин билиһиннэрдэ. Манна Н.О. Кривошапкин бииргэ төрөөбүт быраата  Ньургул кыргыттарын төрүччүтэ сиһилии сырдатыллыбыт. Ол курдук, Үчүгэйтэн — Варвара, Тарынтан — Өппүөнньэ, Томтортон — Балаайа, Боккуо оҕолоро, сиэннэрэ ыйыллыбыттар. Ньургул 16-18 оҕотуттан 9 киһи олоҕун туһунан матырыйаал хомуллубут. Мира Томская аймахтарыгар бэртээхэй этиини киллэрдэ: «Эһиги бары маннык бэйэҕит төрүччүгүтүн тус-туспа оҥостуҥ уонна быйыл сайын Өймөкөөн нэһилиэгэр ыытыллар Байаҕантай ыһыаҕар аҕалан, бары сүүнэ улахан төрүччүнү тэнитэн кэбиһиэххэ«, — диэтэ. Ону аймахтара олус сэргии ылыннылар.

Кырбаһааҥкын аймах туһунан матырыйаалы 1987 сыллаахха Власий Петрович Кривошапкин көмөтүнэн Аргуновтар улахан убайдара Константин Григорьевич Аргунов  хомуйан саҕалаабыт. Кини күн бүгүҥҥэ диэри Ньукулай оҕонньор төрүччүтүн байыта, ситэрэ, саҥарда сылдьар. Онон аймахтарын туһунан туоһулаһыан баҕалаах дьон мантан инньэ Константин Аргунову кытта ыкса билсиэхтэрэ.

Мира Григорьевна аҕата Григорий Лонгинович Аргунов Таатта Дэбдиргэтиттэн төрүттээх. Кини 1939 сыллаахха үөрэҕин бүтэрээт,  Өймөкөөн улууһугар тиийэн, ыраах хоту дойду нэһилиэктэригэр оскуола дириэктэринэн үлэлээбитэ. Тэрийэр үлэҕэ кыахтаах хомуньууһу оскуолатын уларыта-уларыта сонун сүүүрээни киллэртэрэ ыыталлара. Онон билиҥҥи тыыл бэтэрээннэрэ, оччолорго оскуола үөрэнээччилэрэ, Өймөкөөн улууһугар үөрэҕирии сайдарыгар сүҥкэн кылаатын киллэрбит   Григорий Лонгиновиһы   нэһилиэк аайы олус күндүтүк санаан ахталлар, оҕолоругар-сиэннэригэр кэпсииллэр. Ньургуллар биир ситими эрдэттэн олохтообут буолан, бу көрсүһүүгэ халыҥ хамаанда буолан кэлбиттэр. Пелагея Аргунованы Өймөкөөн аатырбыт спортсменнара физкультура уонна спорт эйгэтигэр уһуйбут бастакы учууталларын, тренердэрин быһыытынан бары интервьюларга махтана ахталлар. Ол курдук, саха ааттаах-суоллаах мадьыныта Евгений Сивцев уонна Эверест хайаны сахалартан бастакынан дабайбыт Евгений Кривошапкин, спорт сайдыытыггар үгүс үлэни ыыппыт физкультура учуутала, билигин саха эмчитэ Виктор Кривошапкин учууталларын Пелагея Григорьевнаны успуорт эйгэтигэр уһуйбут киһилэринэн ааҕаллар.

Мира Григорьевна Кырбаһааҥкын аймаҕы түмүүгэ ылсыбыт саҥа көлүөнэ учуутал идэлээх сыдьааннарга Лариса Кривошапкинаҕа, Светлана Винокуроваҕа, Марианна Заровняеваҕа, Клавдия Кривошапкинаҕа олохтоохтук ылсан үлэлээн эрэллэригэр махталын тиэртэ уонна кинилэргэ салгыы маннык көхтөөх үлэни ыыталларыгар эрэнэрин биллэрдэ.

Томтортон куоракка кэлэ сылдьар учуутал Люция Егорова Үчүгэй олохтоохторо, Өймөкөөн улууһугар убаастанар элбэх оҕолоох сис ыал Мелания Петровна уонна Иван Карповтар иккис кыыстара Ньургуллары түмүүгэ улахан үлэни ыыта сылдьар дьонтон биирдэстэрэ. Кини Кырбаһааҥкын халыҥ аймаҕы түмүүгэ ылсыбыт эдэр көлүөнэ дьоҥҥо махталын биллэрдэ.

Өймөкөөн 1-кы гильдиялаах меценат-атыыһыта Н.О. Кривошапкин 2027 сылга 190 сылын туолар үбүлүөйдээх сыла. Онон 2026 сылы Ньукулай оҕонньор хаан-уруу аймахтара бу суолталаах үбүлүөйгэ бэлэмнэнии сылынан биллэрэн, хас да улахан тэрээһини торумнаатылар уонна эппиэттээх дьону таллылар. Ол дьон үлэ күннэрэ саҕаланаатын кытта министиэристибэлэринэн уонна биэдэмистибэлэринэн сылдьан, тэрээһин үлэни ыыппытынан барыахтара.

Меценат-атыыһыт Ньукулай Кырбаһааҥкын аймахтара “Хотугу сардаҥа” хаһыат 35 сыллаах үбүлүөйүнэн сибээстээн 47 киһини суруттулар.  Ол курдук, Төрүт нэһилиэгэр эмчит Анфиса Кривошапкина көҕүлээһининэн 19 киһиэхэ “Хотугу сардаҥа” хаһыаты суруттардылар. Өймөкөөҥҥө Марианна Заровняева  учууталлар Агафья Готовцева уонна Светлана Винокурова өйөбүллэринэн 13 киһиэхэ сурутууну тэрийдэ. Сордоҥнооххо Мария Попова 5 киһини сурттарда. Томторго Люция Егорова 5 киһи суруттарарын ситистэ. Дьокуускай куораттан Лариса Кривошапкина уонна Уус Ньараттан Евгений Кривошапкин 5-тии үлэ бэтэрэннэригэр суруттардылар. Бу бары меценат-атыыһыт Николай Кривошапкин сыдьааннара.

Ити курдук, ханнык баҕарар көҕүлээһини меценат-атыыһыт Ньукулай Кырбаһааҥкын сыдьааннара өрүү өйүү сылдьаллара хайҕаллаах суол.