Мэдиссиинэ кэллиэһэ уонна Сылаҥ орто оскуолата биир сибээстээхтик үлэлииллэр

Профессор Г. П. Башарин аатынан агро-хайысхалаах Сылаҥ орто оскуолата Дьокуускайдааҕы мэдиссиинэ кэллиэһин кытта 2020 сылтан сөбүлэҥ түһэрсэн бииргэ үлэлииллэр.

Киин куорат аатырбыт орто анал үөрэҕин кыһата уонна Чурапчы улууһун биир тарбахха баттанар бастыҥ  үлэлээх уопсай үөрэхтээһин тэрилтэтэ ыкса сибээстээхтик үлэлииллэр.  Бу туһунан  дириэктэри агро-хайысхаҕа солбуйааччы Лидия Сивцева кэпсиир:

— Сылаҥ орто оскуолатын үөрэнээччилэрэ 10-11 кылаастарга, нууччалыыттан тылбаастаабакка билиһиннэрдэххэ, «Младшая медицинская сестра по уходу за больными» диэн анал кууруска үөрэнэн, аттестаттарын кытта тэҥҥэ мэдиссиинэ салаатын орто сүһүөҕүн  исписэлииһин идэтин баһылаабытын туһунан сибидиэтэлистибэни ылаллар. Оччотугар оҕолор доруобуйа харыстабылын тэрилтэлэригэр үлэлиир толору бырааптаналлар, тута анал  категориялаах үлэһит буолаллар. Аны мэдиссиинэ  кэллиэһигэр киирэргэ эбии баал эбиллэр. Маннык сибидиэтэлистибэни барыта 12 оҕо ылла. Быйыл 17 үөрэнээччи ылыахтаах.

Мэдиссиинэ кэллиэһин кытта бииргэ үлэлээһин хайысхата кэҥээн, кэллиэс дириэктэрэ Дмитрий Алексеев  этии киллэрэн, устудьуоннары сибиэһэй аһынан хааччыйарга оскуолаҕа сыал-сорук  туруорбута.

Сайын устата  үлэҕэ уһуйуу маастара  Сардаана Баишева оҕолору кытта оҕуруот аһын арааһын үүннэрдилэр, кус-хаас ииттилэр.

Оҕолор оскуолаларыгар настаабынньыктарын кытта сайын устата үүннэрбит оҕуруоттарын аһын: хортуосканы, сүбүөкүлэни, кабачогу, помидору, минньигэс биэрэһи —  барыта 1 туоннаны тиэйэн аҕалан, балаҕан ыйын 6 күнүгэр  училище салалтатыгар туттардылар.

Аны салгыы кэллиэс устудьуоннарын  түргэнник ситэр кус, хаас, индюк уонна ынах сүөһү этинэн, ис үөрэ, туйах курдук сахалыы аһынан хааччыйыахтара.

Мэдиссиинэ кэллиэһэ  остолобуойун сэбиэдиссэйэ Ирина Матвеева сибиэһэй оҕуруот аһын тутан олус үөрдэ уонна «аны эт бородууксуйатын кэтэһэбин» диэтэ.

Бу курдук, икки үөрэх тэрилтэтэ ыччаты иитиигэ, оҕо доруобуйатыгар олус  суолталаах сөбүлэҥи түһэрсэн, кэскиллээх үлэни тэрийэллэр.
 

Елена ПОТОЦКАЯ, «Саха сирэ» хаһыат.