“Мэдиссиинэ көмөлөһөөччүтүн” нөҥүө быраастарга суруйтарыы элбиир

Бүгүҥҥү күн туругунан өрөспүүбүлүкэҕэ “Мэдиссиинэ көмөлөһөөччүтүн” нөҥүө 11 194 киһи быраастарга суруйтарбыт, ол онтон 4646-та улуустааҕы балыыһаларга. Бу туһунан СӨ Доруобуйа харыстабылын министиэристибэтэ иһитиннэрэр.

“Мэдиссиинэ көмөлөһөөччүтүн” нөҥүө биир сааһыгар диэри оҕолоох ыалларга “медкөрүүгэ кэлиҥ” диэн  12 тыһыынчаттан тахса иһитиннэрии ыытыллыбыт. Итинтэн 5 тыһыынчаттан тахсата улуустааҕы балыыһаларга. Ордук болҕомто доруобуйаларынан хааччахтаах оҕолорго ууруллар. Кинилэргэ инбэлииттэрин хат бигэргэтэллэригэр медкөрүүнү ааһыҥ диэн 2266 биллэрии ыытыллыбыт. Ол түмүгэр 1854 доруобуйаларынан хааччахтаах оҕо мэдиссиинэ көрүүтүн болдьоҕор ааспыт, онтон 828 оҕо улуустааҕы балыыһаларга көрдөрбүт.

«» Мэдиссиинэ көмөлөһөөччүтүн » оҥорор өҥөтө хас да үчүгэй өрүттээх. Ол курдук эмчиттэри кинилэргэ сыһыана суох эбээһинэстэн босхолуур, ыарыһах кэлэрин-барарын көдьүүстээхтик салайар кыаҕы биэрэр уонна быраастар дьону көрөр бириэмэлэрин сааһылыыр. Төрөппүттэр балыыһаҕа атаарар бириэмэлэрэ аҕыйыыр, элбэхтик кэлэр наадалара суох буолар. Ол иһин төрөппүттэр мэдиссиинэ бу өҥөтүн астыналлар», — диэн доруобуйа харыстабылын миниистирэ Лена Афанасьева тоһоҕолоон бэлиэтээтэ.

“Мэдиссиинэ көмөлөһөөччүтэ” бырайыак Ил Дархан Айсен Николаев сорудаҕынан олоххо киирэр. Бу ресурс биир сааһыгар диэри оҕолоох ыаллары уонна доруобуйаларынан хааччахтаах оҕолоох ыаллары туһунан арыаллыыр буолан, мэдиссиинэ көмөтүн хаачыстыбата биллэ тубуста диэн иһитиннэрэр Ил Дархан, бырабыыталыстыба пресс-сулууспата.