Мэдиссиинэҕэ бэлэмниир биэс кыһа

Орто анал үөрэх федеральнай судаарыстыбаннай ыстандаартыгар уларыйыылар киирэн, мантан ыла мэдиссиинэ орто үөрэхтэрин болдьохторо кылгаан биэрдэ. Маны истэн уруккуттан даҕаны куонкурустаах мэдиссиинэ идэлэрин туһунан туоһулаһар дьон элбээтэ. Бүгүн Саха сиригэр орто үөрэхтээх исписэлиистэри бэлэмниир тэрилтэлэр туһунан билиһиннэрэбит.

Дьокуускайдааҕы мэдиссиинэ кэллиэһэ

Дьокуускайдааҕы мэдиссиинэ кэллиэһэ 11-с кы­­лаас эрэ кэнниттэн үөрэххэ ылар. Дьокуускай куораты таһынан, 8 улууска салаалаах (отделениелаах): Ленскэйгэ, Мииринэйгэ, Удачнайга, Ньурбаҕа, Хаандыгаҕа, Сангаарга, Эдьигээҥҥэ, Уус Маайаҕа, Чурапчыга, Бороҕоҥҥо, Тиксиигэ. Бу улуустар олохтоохторо ханна даҕаны ыраах тэлэһийбэккэ, миэстэтигэр сиэстэрэ идэтигэр үөрэнэн дьупулуом ылар кыахтаахтар.

Кэллиэс кэлэр 2023-2024 үөрэх дьылыгар маннык исписээлинэс­тэргэ үөрэххэ ылар: акушер, лабораторнай тиэхиньик, биэлсэр, сиэс­тэрэ, фармацевт, технолог-­эстетист, тиис тиэхиньигэ.

Саха сирин киин куоратыгар уруккуттан орто үөрэхтээх миэдиктэри бэлэмниир кыһа буоларын быһыытынан манна куонкурус үрдүк.

Устудьуоннарга уопсай көрүллэр эрээри, сокуоннай саастарын ситэ иликтэри ылбаттар.

Сиһилии билсиҥ: https://yabmk.ru/ саайтка, +7 (924) 175-24-01 төлөпүөнүнэн билсиҥ.

ХИФУ иһинэн орто үөрэх

М.К.Аммосов аатынан Хотугу­луу-Илиҥҥи федеральнай университет 2020 сылтан орто үөрэхтээх “сиэстэрэ дьыалата” идэҕэ усту­дьуоннары бэлэмнииргэ аккредитация ылбыта. Бу туспа кэллиэс буолбатах, университет Мэдиссиинэҕэ институтун иһинэн үөрэтэллэр. Маҥнай аһылларыгар дьон соччо билбэт эбит буоллаҕына, кэлиҥҥи сылларга киэҥник биһирэннэ, куонкурус балачча үрдүк буолар. Быйыл бүдьүөттэн 20 миэстэ көрүллэр, ону таһынан, 25 төлөбүрдээх миэстэҕэ ылар бы­­лааннаахтар. 11-с кылаас эрэ кэнниттэн үөрэххэ ылаллар.

Сиһилии билсиҥ: priem@s-vfu.ru саайтка, +7 (4112) 49-69-62, +7 (4112) 32-00-47 төлөпүөнүнэн.

Алданнааҕы мэдиссиинэ кэллиэһэ

Алданнааҕы мэдиссиинэ кэллиэһэ урут-уруккуттан чиҥ билиилээх исписэ­лиистэри бэлэмнээн таһаарарынан тарбахха баттанар. Быйыл сиэстэрэ, биэлсэр идэтигэр үөрэххэ ылаллар. Дьокуускайга баар кэллиэстэртэн уратыта диэн, 9-с уонна 11-с кылааһы бүтэрбиттэри ылаллар.

Манна даҕатан эттэххэ, ФГОС уларыйыытынан үөрэх сылын болдьоҕо кыл­гаан биэрдэ. 9-с кылаас кэнниттэн сиэстэрэ идэтигэр үөрэнэ киирбиттэр номнуо 2 сыл 10 ыйынан, биэлсэр идэтигэр киирбиттэр 3 сыл 10 ыйынан дьупулуомнаах үлэһит буолан ханна баҕарар үлэлиэхтэрин сөп. Үөрэхтэрин бүтэрдэхтэринэ үлэнэн хааччыллыы 72 бырыһыаҥҥа тэҥнэһэр диэн исписэлиис иһитиннэрдэ. Атын улуус­тан кэлбиттэри уопсайынан хааччыйаллар.

Сиһилии билсиҥ: http://aldanmedcollege.ru саайтка, 8(411-45) 3-15-25; +79243620725 төлөпүөнүнэн.

Нерюнгритааҕы мэдиссиинэ кэллиэһэ

Нерюнгритааҕы мэдиссиинэ кэллиэһэ миэдиктэри бэлэмнээбитэ быданнаата. Сиэстэрэ, биэлсэр, акушер исписээлинэстэригэр үөрэтэллэр, 9-с уонна 11-с кылаас кэнниттэн үөрэххэ ылаллар. Үөрэх баазатынан хааччыллыы таһыччы. Өлүөхүмэҕэ, Покровскайга салаалардаах, аны күһүҥҥүттэн Сунтаарга аһан үлэлэтиэҕэ. Онон бу улуустарга үөрэнэн идэлээх исписэлиис буолуохха сөп.

Тустаах кэллиэс анал уопсайа суох эрээри, биһиги, суруналыыстар, икки сыллааҕыта пресс-турга сылдьарбытыгар туспа дьиэ туруорсан сорох устудьуоннары хааччыйбыттар этэ. Нерюнгри куорат буоларын быһыытынан, устудьуоннар кыбартыыра түүлэһэн олоруохтарын сөп. Дьокуускайга тэҥнээтэххэ, сыана удамыр.

Сиһилии билсиҥ: https://nmk14.ru/abiturientam  саайтка, +7-924-897-57-04 төлөпүөнүнэн.

Жатайдааҕы тиэхиньикум

Жатайдааҕы тиэхиньикум сэрии кэнниттэн тэриллибитэ. Сүрүннээн оро­буочай идэлэргэ үөрэтэллэр. Атын идэлэри сэргэ сиэстэрэ, мэдиссиинискэй массаас сиэстэрэтэ идэлэргэ бэлэмнииллэр, 9-с уонна 11-с кылаас кэнниттэн ылаллар. Улуустан кэлээччилэри уопсайынан хааччыйаллар.

Тустаах үөрэх кыһата үчүгэйэ диэн, Дьокуускай куораттан чугас, устудьуон санаатаҕын аайы кэлэр-барар кыахтаах, оптуобус күн ахсын ыйыллыбыт бириэмэнэн сылдьар.

Сиһилии билсиҥ: https://zhataytekh.ru  саайтка, +7(4112)426407, +7(4112)427303  төлөпүөнүнэн.

Мэдиссиинэ идэтин баһылааччыларга

Бастатан туран, абитуриент туттарсыан баҕарар үөрэҕин туһунан саайтарыгар киирэн эрдэттэн билсэрэ, быраабыланы ааҕара ордук. Манна докумуону хаһан, хайдах быһыы­лаахтык туталларын, ааспыт сылларга ханнык исписээли­нэстэргэ куонкурус үрдүгүн, хас бааллаах оҕолор киирбиттэрин, төһө миэстэ көрүллүбүтүн, тест туттарар ирдэнэр буоллаҕына, ыытыллар күнүн-дьылын, эбии баалы хайдах ылыахха сөбүн туһунан салааҕа болҕомтону уурарга сүбэлиибит.

Иккиһинэн, ханнык баҕарар орто анал үөрэххэ аттестат орто баалынан үөрэххэ ылаллар. Ол эрээри, миэдик идэтин баһылыан баҕарар киһи бу хайысхаҕа  төһө бэлэмнээҕин бэрэбиэркэ­лиир тест ааһар. Ол эрэ кэнниттэн уопсай куонкуруска кии­­рэллэр. Коронавирус дьаҥынан сибээстээн, ааспыт сылларга үөрэххэ туттар­сааччылар бу тургутуулары тэйиччиттэн олорон туттараллара көҥүллэммит эбит буоллаҕына, холобур, Дьокуускайдааҕы мэдиссии­нэ кэллиэһигэр быйыл абиту­риент бэйэтэ кэлэн тест туттарара ирдэнэр. Онон төрөппүт оҕотун кытта кэлсэр буоллаҕына, уоппускатын хаһан ыларын былаанныыра ордук.

Иккиһинэн, инникитин миэдик, үрүҥ халааттаах аанньал үрдүк аатын сүгүөхтээх киһи булгуччу бэйэтэ доруобай, бары быһыылары ылбыт буолара ирдэнэр.

Орто үөрэхтэргэ хас миэстэ көрүллэрэ ыам ыйын бүтүүтэ, бэс ыйын саҥатыгар чопчуланар. Билигин былаан быһыытынан ыйыллар.

Ирдэниллэр докумуоннар

1. • Сайабылыанньа,
   • Бэйэни туоһулуур доку­муон (пааспар),
   • Аттестат,
   • Мэдиссиинэ ыспыраапката (086У уонна 302Н пуормалаах),
   • Хаартыска (3х4) – 4 устуука,
   • Үөрэх тэрилтэтиттэн харахтарыыстыка.