«Мэдиссиинэҕэ каадыр боппуруоһа бэрэсидьиэн быһаччы сорудаҕынан быһаарыллар»

Владимир Путин байыаннай кэрэспэдьиэн Николай Долгачев биһиги аармыйабыт балаһыанньатын туһунан ыйытыытыгар онно олорор сир-уот уонна дьон дьылҕата Арассыыйа элбэх олохтооҕун долгутарын бэлиэтээтэ.

Саҥа эрэгийиэннэр сайдыыларыгар триллионтан тахса үп көрүллүбүтэ. Өссө 150 миллиарды федерация субъектара саҥа эрэгийиэннэр олохторун чөлүгэр түһэриигэ ыыппыттара.

Судаарыстыба баһылыга эрэгийиэннэр икки ардыларыгар истиҥ чугас сыһыан олохтоммутун бэлиэтээтэ.
Ол курдук, билигин Саха сирэ шефтэһэр Кировскай куоратын бэлиэтиэххэ сөп. Быһа эпииргэ Мелитополь балыыһатыттан видео-сибээс көһүннэ. Бу балыыһаҕа сытааччылары Офтальмология өрөспүүбүлүкэтээҕи килиниичэскэй балыыһатын офтальмологтара эпэрээссийэлээбиттэрэ. Санатан эттэххэ, бу балыыһа салаатын Кировскай куоракка арыйбыттара, ыарыһахтары көрүү бэс ыйын 30 күнүттэн саҕаламмыта.
«Донбасска уонна атын саҥа эрэгийиэннэргэ Саха сирин офтальмологтара эрэ үлэлиир буолбатахтар, ону таһынан педиатрия үрдүк таһымнаах исписэлиистэриттэн турар биригээдэ тиийэн билигин олохтоох оҕолорго диспансеризацияны ыытар.

Кировскай куоракка профильнай мэдиссиинискэй тэрилтэлэр салаалара аһыллыбыттара, саҥа тэриллэри атыыласпыттара, балыыһалар өрөмүөннэммиттэрэ», -– диэн өрөспүүбүлүкэ норуодунай дьокутаата, Офтальмология өрөспүүбүлүкэтээҕи килиниичэскэй балыыһатын кылаабынай бырааһа Иван Луцкан иһитиннэрдэ.

Иван Луцкан быһа эпииргэ тахсыбыт биир идэлээҕэ мэдиссиинэҕэ каадыр боппуруоһа сытыытык турар боппуруостартан биирдэстэрэ буоларын, ол гынан баран, бу боппуруос бэрэсидьиэн быһа сорудаҕын суотугар быһаарылларын туһунан этиитигэр сөбүлэһэр.

«Саха сирин мэдиссиинэтэ кэнники биэс сылга улахан хамсааһын таҕыста, бэрэсидьиэн бырайыактарынан Сүрэх-тымыр киинэ тутулунна, онкология диспансерын тутуу түмүктэнэр. Улуустарга сүүстэн тахса биэлсэр-акушер пууна баар буолла. Мэдисиинэни өйөөһүн куруук улаата турар, бу биһиги олохтоохторбут доруобуйаларын харыстабылыгар көстөр», —диэтэ Иван Луцкан.

СӨ Ил Дарханын уонна бырабыыталыстыбатын пресс-сулууспата.