Мэдиссиинискэй көмө ороскуотун туһунан ыспыраапканы тоҕо биэрэллэрий?

Эмтэнээччилэр ыйытыыларыгар Мэдиссиинэ национальнай киинин исписэлиистэрэ хоруйдууллар.

-Үрдүк технологиялаах мэдиссиинискэй көмөнү  ыларга направлениены хантан ылылларый?

-Үрдүк технологиялаах мэдиссиинискэй көмөнөн ким баҕарар туһанар бырааптаах. Арай, мэдиссиинискэй көрдөрүүлээх буолуохтаах. Эмтэнээччи направлениены сытар балыыһаҕа дириҥ чинчийиини  ааспытын кэннэ ылар. Ол кэнниттэн быраастар хамыыһыйалара ыарыһаҕы үрдүк технологиялаах көмө ханнык көрүҥэр ыытарын быһаарар.

-Эмтэммитим кэннэ мэдисиинискэй көмөҕө төһө үп ороскуоттаммытын туһунан ыспыраапка туох ис хоһооннооҕуй?

-Булгуччулаах мэдиссиинискэй  страховка систиэмэтигэр страховкалаах киһиэхэ иһитиннэрии көрүҥэ киллэриллибитэ. Онно киниэхэ оҥоһуллубут мэдиссиинискэй көмө уонна суумата ыйыллар.  Мэдиссиинискэй тэрилтэҕэ эмтэммит киһи кинини эмтииргэ судаарыстыба төһө үбү бараабытын билэр бырааптаах.

Поликлиникаларга  эмтэнии туһунан ыспыраапка бырааска көрдөрбүтүн,  диагностика чинчийиитин ааспытын эбэтэр эмтэммитин   эрэ кэннэ бэриллэр. Өскөтүн эмтэнээччигэ мэдиссиинискэй көмө сытар эбэтэр күнүскү балыыһаҕа оҥоһуллубут буоллаҕына, итинник ыспыраапканы балыыһаттан тахсарыгар ылар. Ыспыраапкаҕа өҥөлөр испииһэктэрэ уонна суумалара суруллар. Эмтэнээччи ыспыраапканы ылартан аккаастаныан сөп, ол мэдиссиинискэй картаҕа суруллар. Ыспыраапка иһитиннэрэр эрэ хабааннаах, атын туох да сыал-сорук суох.