Мээкиндэ диэн тугуй?

Мээкиндэ диэн тугуй? Урут истибит тылгыт дуо? Соторутааҕыта кинигэ атыылыыр бассаап бөлөхтөн Г.Н.Васильев “Сыма уонна атын астар” диэн 1993 сыллаахха тахсыбыт кинигэтигэр түбэһэн, дьонтон ыллым. Манна былыргы сахалар сыма, лыыба, хохту, уо.д.а. астарын туһунан кэпсэнэр. Дьоҕус эрээри, аныгы ааҕааччыга бэрт туһалаах кинигэ. Онтон сааскы булт кэмэ чугаһаабытынан мээкиндэ туһунан быһа тардан сырдатабыт.

“…Оттон андыны, куһу хатарыыны сорохтор истибэтэх буолуоххутун сөп. Мин ыйыталаһан көрөөччүбүн буолан баран, итини билэр киһини көрсө иликпин. Онон сылыктаатахха маннык дьарык отой даҕаны тарҕамматах курдук. Хатарыллыбыт андыны мээкиндэ диэн ааттыыллар. Манна даҕатан эттэххэ, Бүлүү оройуонугар Мээкиндэ диэн ааттаах күөллэр бааллар. Топонимиканан киирэр буоллахха, күөл аата уонна ити ас сибээстээхтэр.

Мээкиндэни хайдах оҥороллоруй?… Сибиэһэй андыны үргээн баран, устатынан, ортотунан хайыталлар уонна улахан да, кыра да уҥуохтарын ылҕаан кэбиһэллэр. Этин тириитигэр кыра-кыра кэрчик гына бысталыыллар. Маһы тырыыҥкалаан тириитигэр сараччы тиирэн кэбиһэллэр. Күн көрөр уонна тыал охсор сиригэр туорай маска кэккэлэччи ыйыыллар, биирдиилээн ураҕаска баайыахха эмиэ сөп. Хас эмэ хонукка тыалга оҕустаран биэтэҥнии турааччылар. Биллэн турар ардахха баттаппаттар, хомуйа охсон кэбиһэллэр. Улахан куйааска анды сыата ууллан таммалыы турааччы… Эмис атын үөл куһу эмиэ итинник хатаран хаһааныахха сөп”, — диэн ааптар суруйар.

Онтон аныгы кусчуттар, булчуттар өбүгэлэрбит аһы хаһаанар ньымаларыттан төһө элбэҕи билэллэрэ, туһаналлара буолла.