Мэҥэ Хаҥалас оройуонун 100 саастаах олохтооҕор 1 мөл. солк. туттардылар

Мэҥэ Хаҥалас оройуонун 100 саастаах олохтооҕор 1 мөлүйүөн солкуобайы туттардылар.

Аллараа Бэстээх бөһүөлэгин олохтооҕо, Аҕа дойду Улуу сэриитин тыыл бэтэрээнэ Нина Оданеһы  100 сааһынан эҕэрдэлээтилэр. Уһун үйэлээх ытык кырдьаҕаска «Үйэ саас» бочуоттаах бэлиэни туттардылар уонна 1 мөл. солк. харчынан наҕараадалаатылар.

Нина Павловна Оданец – Аҕа дойду Улуу сэриитин тыыл бэтэрээнэ. Сэрии сылларыгар улахан дьону кытта тэҥҥэ холкуоска хонууга үлэлээбитэ. Үбүлүөйүн ытык кырдьаҕас аймахтарын, чугас дьонун ортотугар бэлиэтээтэ. «Бүгүн биһиги Нина Павловнаны үөрүүлээхтик эҕэрдэлээтибит. Дойду Бэрэсидьиэнэ Владимир Путин аатыттан эҕэрдэ суругу уонна Ил Дархан Айсен Николаевтан «Үйэ саас» бэлиэни туттардыбыт»,  — диэн Үлэҕэ уонна социальнай сайдыыга миниистирэ Елена Волкова иһитиннэрдэ.

Санатан эттэххэ, 100 саастарын туолбут Саха сирин олохтоохторугар  Айсен Николаев сорудаҕынан 1 мөлүйүөн солкуобай аныыллар. Үлэҕэ уонна социальнай сайдыыга министиэристибэтин чахчыларынан, Саха сиригэр 100 уонна онтон элбэх саастаах 18 уһун үйэлээх ытык кырдьаҕас баар.