“Мэхээлэчээн булчут” 5 мөлүйүөн солкуобай кэриҥэ инвестицияны тарта

Саха киинэтэ аан бастаан сыыппара үбүн актыыптарын нөҥүө 5 мөлүйүөн солкуобай кэриҥэ инвестицияны тарта.

Режиссер Александр Лукин туруорбут киинэтэ “Мэхээлэчээн булчут” («Мои таежные каникулы») Тимофей Сметанин уонна Яков Стручков оҕолорго аналлаах кэпсээннэринэн уһуллубута. Көмпүүтэр графикатын туһанан харамайдары тыыннаахтыы көрдөрүү уонна саҥардыы — эрэгийиэннээҕи  киинэҕэ бастакы ньыма. Киинэни быйыл саас көрөөччү киэҥ араҥатыгар билиһиннэриэхтэрэ. Ис хоһооно тайҕаҕа уол оҕо сырыыларыгар олоҕурар. Киинэ Амма, Хаҥалас, Горнай улуустарыгар уонна Москваҕа уһуллубута.

СӨ сайдыытын корпорацията иһитиннэрбитинэн, үп-харчы хомуйуута Токеон платформатыгар ыытыллыбыта. “Мэхээлэчээн булчут” («Мои таежные каникулы») » киинэҕэ 20-тэн тахса инвестор 5 мөлүйүөн солкуобайы  укпуттара. Хомуллубут үбү киинэ уустук көмпүүтэр графикатын уонна анимациятын оҥорууга туттуллар. Бу түһүмэх киинэ сонун көрүҥүн олоххо киллэриигэ сүрүн суолталаах.

Toкеон платформата Арассыыйаҕа сыыппараҕа үп актыыптарын ырыынагар биир биллэр-көстөр лиидэрэ. Кини килийиэннэринэн финтех, дьиэ-уот уонна лизинг салаатыгар үлэлиир бааннар уонна хампаанньалар буолаллар.

Сиһилии https://www.sakha.gov.ru/news/18804 сигэнэн аах.