Мэйиктэр Бырабыыталыстыба отчуотун биһирээтилэр
![](https://sakha-sire.ru/wp-content/uploads/2024/02/mejik-3-1060x596.jpg)
Ситэриилээх былаас Үөһээ Бүлүү улууһун нэһилиэктэринэн ааспыт сыллааҕы үлэтин түмүгүнэн отчуотун салгыыр. Отчуоттуур бөлөх бастакы күнүн иккис аҥарыгар Мэйик нэһилиэгэр үлэлээтэ.
Мэйик нэһилиэгэ улуус кииниттэн 85 көс хоту сытар. Нэһилиэнньэтин ахсаана 606 киһи.
Нэһилиэнньэни кытары көрсүһүүгэ Саха сирин салалтатын ааспыт сыллаах үлэтин-хамнаһын, ситиһиитин, социальнай-экэнэмиичэскэй балаһыанньатын туһунан өрөспүүбүлүкэ экэниэмикэҕэ миниистирэ Петр Попов кэпсээтэ. Салгыы саҥа талыллыбыт улуус баһылыга Валерий Николаев мустубут дьоҥҥо кинини итэҕэйэн талбыттарыгар махтанарын биллэрдэ. Бэлиэтээн эттэххэ, Валерий Николаев Үөһээ Бүлүү улууһун баһылыгын солотугар бэҕэһээ эрэ киирбитэ. Оттон бүгүн улуус аҕа баһылыгын быһыытынан үлэтин сарсыарда Далыр, Мэйик нэһилиэктэриттэн бырабыыталыстыба отчуотуттан саҕалаата.
Мэйик нэһилиэгин бочуоттаах олохтооҕо, оскуола учуутала, кыраайы үөрэтээччи Владимир Федоров Мэйик нэһилиэгэр оскуола төрүттэниитин устуоруйата 1914 с. саҕаланарын туоһулуур архыып докумуоннара көстүбүттэринэн статуһун уларытары туруоруста. Итини таһынан Мэйик оскуолатын тутуу боппуруоһа күүскэ турар.
Оскуола дьиэтэ эргэрэн, самнан, көтүрүллэн, билигин 50-н тахса оҕо элбэх хайысханы толорор кииҥҥэ кыттыһан олорор. Онон мэйиктэр улахан кыһалҕаларынан оскуола тутуута буолар. Салгыы тыл эппит дьон сыл аайы отчуокка туруорсалларын, ол гынан баран боппуруос оннуттан хамсаабатын эттилэр. Оробуочай бөлөх тустаах эппиэттээх тэрилтэттэн боппуруоһу быһаарсыах буолла. Нэһилиэк олохтооҕо Март Яковлев Бүлүү өрүһү туоруур муостаны туруоруста. Онуоха Экэниэмикэ миниистирэ Петр Попов муоста сыаната 43 млрд. солк. симиэтэлэнэн уустугурбутун эттэ. Ол эрээри, Арассыыйа Бэрэсидьиэнэ Владимир Путин 2030 с. диэри Мииринэйгэ диэри түөрт муостаны тутан суолу харгыһа суох оҥорорго диэн сорудахтаабыта, онон чугастааҕы кэмҥэ тутуллуон сөп диэн быһаарда.
Мэйик нэһилиэгин элбэх оҕолоох ийэтэ Екатерина Спиридонова сэттэ оҕолооҕунан дьиэҕэ уочаракка турбута ырааппытын, биэс оҕото оскуоланы бүтэрбиттэрин,дьиэни хаһан ылыаҕын ыйытта.
Тутуу уонна олох-дьаһах бэлиитикэтин департаменын салайааччытын солбуйааччы Марианна Соловьева Мэйик нэһилиэгин элбэх оҕолоох икки ыалыгар дьиэ ылалларыгар, ол иһигэр Екатерина Яковлеваҕа уонна биир ыалга дьиэ туттарга сэртипикээт бэриллэрин туһунан иһитиннэрбитин олохтоохтор дохсун ытыс тыаһынан арыаллаатылар. Мэйиктэр сэргэх сэһэннээх, чопчу этиилээх дьон буолан биэрдилэр.
Нэһилиэк олохтоохторо бырабыыталыстыба ааспыт сыллааҕы үлэтин отчуота хаһааҥҥытааҕар да сэргэхтик, өрө көтөҕүллүүлээхтик ааспытын бэлиэтээтилэр уонна биһирииллэрин биллэрдилэр.
Хаартыскаларга ааптар түһэриитэ.
Сообщить об опечатке
Текст, который будет отправлен нашим редакторам: