Мэйиктэр күргүөмнээх үлэ күөнүгэр

Ыам ыйа Саха сиригэр, үгэс курдук, көхтөөх үлэ, субуотунньуктар ыйдарынан буолар. Улуус аайы мас бэлэмнээһинин,  ырааһырдыы, тупсарыы үлэлэрэ барар, онно дьон күргүөмүнэн кыттар.

Үөһээ Бүлүү улууһун Мэйик нэһилиэгэр Улуу Кыайыы 80 сылын көрсө уонна Маай бырааһынньыктарын өрөбүллэригэр тэрилтэлэр үлэһиттэрэ бары субуотунньуктуу таҕыстылар.

Дьахталлар уонна оҕолор нэһилиэги ыраастаатылар, оттон эр дьон  ойуурга мас мастаатылар. Субуотунньукка мастаммыт маһы, бастатан туран, анал байыаннай дьайыыга кытта сылдьан сырдык тыына быстыбыт Дмитрий Михайлович Иванов ийэтигэр – Дьоруой Ийэҕэ, үлэ бэтэрээнигэр Марфа Ивановнаҕа киллэрдилэр.

Мэйик үлэһит дьоно аҥардас хаалбыт биир дойдулаахтарын эмиэ умнубат. Нэһилэк дьаһалтата соҕотох олорор дьоҥҥо тыраахтарынан мас киллэрэн биэрэн, кыһалҕалаахтар үөрүүрэ муҥура суох.