Мэйиктэр оскуола тутуутун туруорсаллар

Бырабыыталыстыба Үөһээ Бүлүү улууһугар отчуота салҕанар. Бастакы оробуочай бөлөх күн иккис аҥарыгар Мэйик нэһилиэгэр үлэлиир.

Мэйик нэһилиэгэр 606 киһи регистрациялаах, ол эрээри барбакка-кэлбэккэ олорооччута — 430.

Өрөспүүбүлүкэ ситэриилээх былааһын 2024 с. үлэтин кэпсиир презентацияны көрүү кэнниттэн Арассыыйа уонна Саха сирин өрөгөйүн ырыата тыаһаата.

Салгыы бөлөх салайааччыта ааспыт сыл ситиһиилэрин кэпсээтэ, ол кэнниттэн олохтоохтор туруорсууларын этиннилэр.
Бастакынан нэһилиэк дьокутаата Иннокентий Хобусаров кыһалҕалаах боппуруостарын туруоруста. Кини оскуоланы туттарыы, уот лииньийэтин тутуу, балыыһаны туттарыы, нэһилиэк иһинээҕи суолу оҥоруу, о.д.а. туруоруста.

Оттон кыраайы үөрэтээччи, учуутал Владимир Федоров В.И.Степанов-Буучугурас курдук Мэйик номоххо киирбит хапсаҕайдьыттаах, киэн туттар бөҕөстөөх сиргэ успуорт саала тутуллара наадалааҕын эттэ.

Бэлиэтээн эттэххэ, Мэйиккэ былыр тутуллубут оскуола саалата баар, ол даҕаны эмэҕирэн хаарбах туруктанан турар.
Отчуоттуур бөлөх аан бастаан биир эмэ өрөспүүбүлүкэтээҕи дуу, федеральнай дуу инвестбырагыраамаҕа уочаракка киллэриэххэ диэн быһаарда. Экэнэмиичэскэй балаһыанньа тубустаҕына тута киирсэр курдук, эрдэттэн бырайыак оҥоһуллуон наада диэн түмүккэ кэллилэр.

Олохтоохтору өссө биир кыһалҕа долгутар. «Сахатранснефтегаз» тэрилтэ нэһилиэк бүддьүөтүттэн элбэх иэскэ киирбитин, суут оннук уураахтааҕын, ону хайдах эмэ быһаарарга көрдөстүлэр. Манна отчуоттуур бөлөх сөптөөх сүбэни тута биэрдэ.

Мэйик олохтоохторо быйыл бырабыыталыстыба отчуоттуур бөлөҕө атах-тэпсэн олорон истиҥник кэпсэппититтэн астыналларын уонна үгүс үлэ барбытынан үчүгэйинэн сыаналыылларын эттилэр. Бүгүн ситэриилээх былаас отчуотугар 42 киһи кытынна. Отчуот түмүгүнэн икки тыын кыһалҕа, бастакытынан, оскуола тутуллуута, иккиһинэн, нэһилиэк дьаһалтатын улахан иэстэн таһаарыы бэлиэтэннэ.

Ааптар хаартыскаларга түһэриитэ