Мэлдьэхси нэһилиэгэр бэлиэ түгэн

Олунньу 1 күнүгэр Мэлдьэхси нэһилиэгэр  Саха Өрөспүүбүлүкэтин норуотун хаһаайыстыбатын үтүөлээх үлэһитэ, «Гражданскай килбиэн» бэлиэ хаһаайына, Саха Өрөспүүбүлүкэтин Бочуоттаах кырдьаҕаһа, Мэҥэ Хаҥалас уонна Мэлдьэхси нэһилиэгин Бочуоттаах олохтооҕо, Мэҥэ Хаҥалас улууһун «Сыана бэтэрээнэ» бэлиэ, «Сэрии оҕолоро» мэтээл хаһаайына  Иннокентий Маркович Михайлов-Сыромятников аатын, үлэтин-хамнаһын, мөссүөнүн үйэтитэр бүүһүн арыллыыта буолла.

Бүүһү арыйыыга улуус дьокутааттарын Сэбиэтин бэрэссэдээтэлэ Иннокентий Андросов, Мэлдьэхси нэһилиэгин тыа сирин түөлбэтин баһылыга Валерий Никифоров, бүүһү  оҥорбут скульптор Нюргустана Филиппова уонна Иннокентий Маркович төрөппүт кыыһа Октябрина Жукова, Ил Түмэн дьокутаата, Мэлдьэхси орто оскуолатыгар дириэктэринэн үлэлээн ааспыт Андрей Находкин, өр сылга бииргэ алтыһан үлэлээбит Мэҥэ Хаҥалас улууһун, Баатара нэһилиэгин бочуоттаах олохтооҕо Иван Ходулов уонна Иннокентий Маркович уола Иннокентий Иннокентьевич кытыннылар.

Бүүһү чочуйан оҥорууга үлэлээбит скульптордарга  Нюргустана Филипповаҕа, Николай Филипповка уонна Дмитрий Петровка улуус уонна нэһилиэк салалтатын Махтал суруктара туттарылыннылар. А.В.Чугунов аатын сүгэр Мэлдьэхси орто оскуолатын үрдүкү кылааһын үөрэнээччилэрэ, учууталлара, нэһилиэк  олохтоохторо, ыаллыы 1-кы Баатара нэһилиэгин баһылыга Петр Андросов, Баатара нэһилиэгин баһылыга Дмитрий Акимов Иннокентий Марковичтыын бииргэ алтыһан үлэлээбит дьоно-сэргэтэ кыттыыны ыллылар. Михайлов-Сыромятников Иннокентий Маркович кэргэнин Анастасия Самсоновна Романова, оҕолорун, аймахтарын махтал тылларынан өйдөбүнньүк түгэн түмүктэннэ.

Мария Григорьева