Мэлдьэхсилэр биир дойдулаахтарын аахсыйа-тэрээһиҥҥэ ыҥыраллар

Сааскы күн сылааһын айхаллаан Мэлдьэхси дьоно-сэргэтэ эмиэ атын нэһилиэктэр курдук үлэ үөһүгэр сылдьабыт.

Нэһилиэкпит олохтоохторо Арассыыйа бэрэсидьиэнин быыбарыгар көхтөөхтүк кытыннылар. Итиэннэ нэһилиэкпитигэр саҥа ФАП, хаарбах туруктаах дьиэттэн көһөрүү бырагырааматынан элбэх кыбартыыралаах таас дьиэ тутуллаары сыбаайалара кэллэ.

Быйыл 2024 сыл нэһилиэкпитигэр Аҕа баһылыкпыт Валерий Георгиевич Никифоров Култуура уонна айылгы сылынан биллэрбитэ. Ол чэрчитинэн араас элбэх тэрээһиннэр былааннаналлар. Мэлдьэхсибит эр дьоно түмсэн, байыаннай дьайыыттан уоппускаҕа кэлэ сылдьар уолаттарбытын кытта көрсүһүү буолла. Этэҥҥэ сылдьан кэлин диэн алгысчыт биир дойдулаахпыт Зиновий Иванович Игнатьев алҕаата, харысхаллары туттартаата. Нэһилиэкпит эр дьоно субуотунньуктаан саха быһахтарын оҥорон бэлэх ууннулар.

Ааспыт өрөбүлгэ ырыа, хомус, кыл кылыһах төрүт дорҕоон тыаһыгар дьоммут ис санааларын сааһылыыр, туруктарын бөҕөргөтөр сыаллаах, байыаннай дьайыы кыттыылаахтарын төрөппүттэригэр, чугас ыкса дэриэбинэбит дьонугар сынньалаҥ киэһэтэ тэрилиннэ. Ыалдьыттарынан норуот маастара Руслан Габышев, култуура туйгуна Элеонора Соколова, аан дойду виртуоз хомусчута бэйэбит кыыспыт Варвара Степанова- Арчыына буоллулар.

Аны кулун тутар 20 күнүгэр улуустааҕы Аҕа күрэҕэ биһиги нэһилиэкпитигэр ыытыллыаҕа. Онтон Дьокуускай куоракка кулууппут үлэҕэ киирэригэр көмө көрдүүр сыаллаах Мэлдьэхситтэн төрүттээх, олорон, үлэлээн, үөрэнэн ааспыт биир дойдулаахтарбытын кытта көрсөн дьоро киэһэ ыытыахпыт. Дойдубут аһынан-үөлүнэн атыы дьаарбаҥкатын тэрийиэхпит, уран уустарбыт быыстапкалара туруоҕа уонна талааннаах ыччат дьоммут, дьиэ кэргэттэрбит эҕэрдэ кэнсиэрдэрэ былааннанар.

Биир дойдулаахтарбытын, үлэлээн, үөрэнэн ааспыт дьоммутун бу дьыл кулун тутар 23 күнүгэр 17:00 чаастан «Киэҥ Мэлдьэхси ыҥырар» аахсыйа-тэрээһиммитигэр М.Н. Жирков аатынан музыкальнай колледж концертнай саалатыгар күүтэбит, ыҥырабыт! Бэрт истиҥ-иһирэх алтыһыы буолуо диэн мэктиэлиибит!

Матрена Сыромятникова.