Мөлүйүөннээх кыыска 1 мөлүйүөнү биэрдилэр

Туймаада ыһыаҕар Ил Дархан Айсен Николаев өрөспүүбүлүкэ нэһилиэнньэтэ  1 мөлүйүөн киһи буолбутун туһунан үөрүүлээх сонуну иһитиннэрбитэ. Мөлүйүөн ахсааннаах кыыс Мииринэй оройуонугар олорор Арина, Гаврил  Онуфриевтар дьиэ кэргэттэригэр иккис оҕонон төрөөбүтэ.

Бэс ыйын 27 күнүгэр М.Е. Николаев аатынан Национальнай мэдиссиинэ кииниттэн саҥа төрөөбүт кыыһы балыыһаттан таһаарыы үөрүүлээх быһыыга-майгыга буолла. Кыыска СӨ бырабыыталыстыбатын аатыттан «Алмаасэргиэнбаан» 1 мөлүйүөн солкуобайдаах сэртипикээти анаата, ону тэҥэ, дьиэ кэргэҥҥэ «100 сыл оҕолоро» хапытаалы туттардылар.

Бу кылааты «Билии» диэн ааттаан, кэлин үөрэххэ туһанарга анаатылар. Онуфриевтар кэтэһиилээх кыыстарыгар Ийэ хапытаалын эмиэ ылан туһаныахтаахтар.

Төрөппүттэрин үөрүүлэрэ үгүс. 4,1 киилэ ыйааһыннаах, 56 см уһуннаах  саҥа төрөөбүт оҕону сайын кыыһа Сайыына диэн ааттаатылар. Онуфриевтар бу үөрүүлээх сонуну тэлэбиисэринэн ыһыаҕы көрө олорон, Ил Дархан этиититтэн истэн, олус соһуйбуттар. Өрөспүүбүлүкэ араас муннуктарыттан элбэх эҕэрдэ киирбит.