Мэҥэ Алдан ыһыаҕа Егор Неймоховка ананна

Кэрэ, дьикти айылҕалаах Томпо улууһун Мэҥэ Алдан нэһилиэгэр Е. П. Неймохов төрөөбүтэ 75 сылыгар аналлаах үбүлүөйдээх ыһыахха ыҥырыылаах ыалдьыт буолан кыттыыны ылан кэллим.

Тэрээһин үрдүк таһымнаахтык ыытылынна. Ыһыах сиэрэ-туома, Кыайыы үбүлүөйдээх 80 сылыгар, Е. П. Неймохов төрөөбүтэ 75 сылыгар аналлаах дьүһүйүүлэр, түөлбэлэр күрэстэрэ, спортивнай күрэхтэһиилэр, ас-үөл тэрээһинэ, бириистэр хас биирдии киһи санаатын кынаттаатылар, үөрүүнү сахтылар. Нэһилиэк хас биирдии олохтооҕо ыһыах тэрээһинигэр кыһамньытын уурбутун бэлиэтии көрдүбүт.

Е.П. Неймохов дьиэ кэргэттэрэ, аймахтара анал бириистэри туруоран кыайыылаахтар өрөгөйдөрүн үрдэттилэр, норуот суруйааччытын аата дорҕоонноохтук ааттанна. Олохтоох дьаһалтаҕа, култуура үлэһиттэригэр, сынньалаҥмытын тэрийсибит Елена Пантелеймоновна дьиэ кэргэнигэр дириҥ махталбытын тиэрдэбит. Суруйааччылар түөлбэ, Е.П. Неймохов айымньыларын ааҕыы күрэстэригэр дьүүллүүр сүбэҕэ үлэлэһэн, сэмэй кылааппытын киллэристибит. Талаан норуокка баар эбит диэн өссө төгүл итэҕэйдибит.

Айылҕа бэйэтэ ыһыах күн алгыстаах ардаҕынан, күнүн уотунан, сөрүүн сиккиэринэн хатаҕалаата. Кэрэ көстүүтүнэн кууһан ылан барыбытын угуттаата. Мэҥэ Алдан үлэһит дьонугар ситиһиилэри, дьолу-соргуну, инникигэ эрэли баҕарабын!

Е. А. Филатова — Сыгыйык,

СӨ Суруйааччыларын сойууһун чилиэнэ.

Хаартыскалар: ааптар тиксэриилэрэ