Мэҥэ Алдаҥҥа байыастар дьиэ кэргэттэригэр муус бэлэмнээтилэр

Кыһыммыт саҕаланыан иннинэ Мэҥэ Алдан нэһилиэгэр байыаннай дьайыы кыттыылаахтарын дьиэ кэргэттэригэр үгэс быһыытынан муус бэлэмнээтилэр.

«Бу суолталаах үлэ. Дойду интэриэһин көмүскүүр дьоммутугар уонна кинилэр кэннилэригэр хаалбыт чугас дьонноругар биһиги кылааппыт», – диэн «Томпо оройуонун сонуннара» телеграм-ханаал иһитиннэрэр.

Бу тэрээһиҥҥэ нэһилиэк тэрилтэлэрин үлэһиттэрэ көхтөөхтүк кыттан, дьиҥнээх Гражданскай сомоҕолоһууну уонна эппиэтинэһи көрдөрдүлэр: «Мэҥэ Алдан нэһилиэгэ» МТ дьаһалтата, 4 №-дээх баһаарынай чаас,  Е.П. Неймохов аатынан «Мэҥэ Алдан кыраайы үөрэтэр музейа» МКУ,  Н.И. Колодезников аатынан «Тыа сирин култууратын дыбарыаһа» МБУ,  П.Е. Саввин аатынан «Мэҥэ Алдан успуорт саалата» МБУ,  ОДьКХ ГУП учаастага,  Тыа хаһаайыстыбатын управлениета.

Бары биир сомоҕо, түмсүүлээх үлэ түмүгэр, муус наадалаах саппааһа бэлэмнэннэ. Нэһилиэк дьаһалтата  үтүө уонна туһалаах дьыалаҕа кыттыбыт дьоҥҥо барыларыгар ис сүрэҕиттэн махтанар! Эһиги көмөҕүт – бу көннөрү этиинэн-сиининэн үлэ буолбатах, бу – дьиҥнээх өйөбүл уонна биһиги бары бииргэбитин, нэһилиэкпитигэр бэйэ-бэйэҕэ көмөлөһүү уонна үтүөнү оҥоруу үгэстэрэ күүстээҕин туоһулуур бэлиэ.