Мэҥэ Алдаҥҥа Иннокентий Яковлев сырдык кэриэһигэр гиирэ турнира ыытыллар

Кулун тутар 22-23 күннэригэр Томпо улууһун Мэҥэ Алдан нэһилиэгэр байыаннай дьайыыга кыттыбыт Яковлев Иннокентий Иванович сырдык кэриэһигэр гиирэ  успуордугар өрөспүүбүлүкэтээҕи турнир ыытыллыаҕа. Бу күрэхтэһии  П.Е.Саввин аатынан успуорт саалатыгар буолуоҕа.

Ол курдук, 48, 55, 55  үөһээ ыйааһыҥҥа эдэр кыргыттар, уолаттар, 60,65, 65 киилэттэн үөһээ ыйааһыннаах дьахталлар, 63 уонна 63 киилэттэн үөһээ ыйааһыннаах бэтэрээн дьахталлар, 65,70, 75, 80, 80 үөһээ ыйааһыннаах эр дьон, 75 уонна 75 киилэттэн үөһээ ыйааһыҥҥа бэтэрээн эр дьон гиирэни  анньыахтара.

Бу патриотическай ис хоһоонноох уонна успуорт улахан түһүлгэтин Томпо улууһун дьаһалтатын өйөбүлүнэн Мэҥэ Алдан нэһилиэгэ тэрийэрэ кэрэхсэбиллээх.

“Байыаннай дьайыы кыттыылааҕа Иннокентий Иванович бу дойдуга улаатан, оскуоланы бүтэрбитэ. Кини байыаннай дьайыыга Жатайтан ыҥырыллан барбыта. Онон кини сырдык аатын үйэтитээри бу өрөспүүбүлүкэ таһымнаах турниры ыытабыт”, — диэтэ нэһилиэк баһылыга Юрий  Комиссаров.