Мэҥэ Хаҥалас Быраматыгар суол саахалыгар эр киһи өллө

Бүгүн, балаҕан ыйын 26 күнүгэр, Мэҥэ Хаҥалас улууһун Бырама нэһилиэгэр суол саахала тахсыбытын туһунан ИДьМ улуустааҕы салаатыгар иһитиннэрии кэлбит.

Быһылаан тахсыбыт сиригэр Госавтоиниспиэксийэ үлэһиттэрэ тиийбиттэр. Бэрэбиэркэ түмүгүнэн биллибитэ, 1992 с.т. эр киһи күнүс эбиэт саҕана Регул Мото матасыыкылы ыытан иһэн сатаан уруулун салайбакка ЛЭП остуолбатыгар баран түспүт. Быһылаан түмүгэр, суһал мэдиссиинэ көмөтө кэлиэр диэри эр киһи тыына быстыбыт.  Суорума суолламмыт эр киһи мотошлема суох айаннаан испит уонна матасыыкыл ыытар бырааба суоҕа биллибит. Бу туһунан СӨ ИДьМ Госавтоиниспиэксийэ Управлениета иһитиннэрдэ.