Мэҥэ Хаҥалас Чүүйэтигэр үтүө үгэһи сөргүттүлэр

Былыр былыргыттан саха дьоно бэйэ-бэйэлэригэр ыалдьыттаатахтарына өрүү илии тутуурдаах, өттүк харалаах буолаллара.

Ити үгэһи былырыын Чүүйэ нэһилиэгин олохтоохторо сөргүтэн, дириҥ ис хоһоонноох тэрээһини тэрийбиттэрэ. Бу туһунан сиһилии биһиги уопсастыбаннай кэрэспэдьиэммит, Мэҥэ Хаҥалас улууһун Ытык Сүбэтин салайааччыта, алгысчыт Зиновий Игнатьев маннык кэпсиир:

— Сыстыганнаах дьаҥ кэмигэр бары дьиэбитигэр бүгэн олорон, бэйэ-бэйэбитигэр сылдьыспат буолбуппут. Киһи ыалга сылдьыан да куттанара баар суол этэ. Ол да иһин буолуо, күүстээх бобуу-хайыы, харантыын кэнниттэн чүүйэлэр дьон оннуларын булалларыгар көмөлөһөр тэрээһини тэрийбиттэрэ. Кулууп үлэһиттэрэ ыалынан саламалаах сылдьан  «Ийэлэрбит үтүө үгэстэринэн» диэн ааттаан, кэһиилээх бэйэлэрин чугас ыалларыгар тахсыбыттара. Онтон салгыы кэһии туппут ыал, аны бэйэтэ кэһиилэнэн нөҥүө ыалыгар барыахтааҕа. Тэрээһин соруга оннук этэ. Бу бэртээхэй истиҥ тэрээһини Чүүйэ кулуубун дириэктэрэ  Саргылана Атласова көҕүлээн тэрийбитэ. Онон Чүүйэҕэ бэрт сэргэх тэрээһин ааспыта. Ким балык, ким үүттээх сүөгэй, ким идэһэ этэ кэһиилэнэн  ыалларын күндүлээбиттэрэ.  
Быйыл ол үтүө үгэс салҕанна. Ходоро нэһилиэгэр Чүүйэҕэ сэтинньи 30 күнүттэн ахсынньы 12 күнүгэр диэри Олоҥхо дэкээдэтин чэрчитинэн «Уруйдан, улуу Олоҥхо, Манчаары дойдутугар!» диэн араас тэрээһин ыытылынна.  Онтон биирэ — түөлбэлэринэн  «Олоҥхо дойдутун алгыстаах алаадьытын кытыйата» аахсыйа.

Онно Чүүйэ кулуубун дириэктэрэ  Саргылана  Атласова түөлбэ түөрт салайааччытын кытта сүбэлэһэн, ыалларынан кэһиилээх айаны тэрийдилэр. Ол курдук,   биир ыалтан саҕалаан, бастаан бэйэлэрин ыалларыгар кытыйаҕа алаадьылаах саҕалаатылар.

Ол кэнниттэн ыалтан ыалга эмиэ былырыыҥҥы курдук кэһии туппут киһи үксээтэ.

Түөлбэ аайы  дьон бары тэрээһиҥҥэ көхтөөхтүк кыттан,  үөрэн-көтөн, ким эт, ким балык, ким барыанньа, сир аһын бэрсэн, бэлэх, кэһии тутан  үтүө үгэс сөргүтүлүннэ. 

Үтүө санаа аахсыйатыгар 120 -чэ ыал хабыллан, бары да астыннылар.  Түмүккэ, сайдыылаах үйэҕэ олорорбут быһыытынан, түөлбэлэр салайааччылара аахсыйа кыттыылаахтарын хаартыскаҕа түһэрэн, видеоҕа устан үйэтиппиттэрин көрдөрдүлэр. Онон тэрээһин соругун толору ситтэ — ыал ыалын кытта өйөһөн, истиҥ сыһыаны үөскэтэн иллээхтик олоруута ситиһилиннэ.  

Сахалар үтүө үгэспит —  бэйэ-бэйэҕэ истиҥ сыһыаммыт хаһан да уостубатын.  «Ойуурдаах куобах охтубат, дьонноох киһи тутайбат» диэн өбүгэ саҕаттан кэлбит өс хоһоонун Мэҥэ Хаҥалас Чүүйэтин олохтоохторо  бэйэлэрин холобурдарынан бигэргэттилэр.