Мэҥэ Хаҥалас олохтооҕо ойуур баһаарын ыытан 890 тыһыынчаттан тахса солкуобайы төлүөҕэ

Мэҥэ Хаҥалас оройуонун борокуратуурата бэрэбиэркэ ыыппытын түмүгэр, 2022 с. баһаар сезонугар Майатааҕы ойуур хаһаайыстыбатын учаастагар, биир киһи өрүс кытыытыгар хаппыт оту өртөөн баран, ситэри умуруорбакка барбыт. Онтон ойуур баһаара тахсан 3 гаа сири уот сиэбитин быһаарбыттар.

Ол туһунан СӨ Борокуратууратын пресс-сулуспата иһитиннэрэр.

Буруйданааччы административнай эппиэтинэскэ тардыллан, ыстараап анаммыт, ол эрээри көҥүл өттүнэн ойуур баһаарын умуруорууга ороскуоттаммыт үбү төлөөбөтөх.

Мэҥэ Хаҥалас борокуратуурата буруйданааччы ойуур баһаарын умуруорууга ороскуоттаммыт үбү толуйбатаҕын иһин, суукка биэрбит. Суут борокуруор ирдэбилин сөптөөҕүнэн ааҕан, буруйданааччыттан 891 269 солк. харчыны төлөттөрөр уурааҕы таһаарда.

Суут быһаарыыта сокуоннай күүһүгэр киирдэ, толоруу оройуон борокуруорун хонтуруолугар сылдьар.