Мэҥэ хаҥалас олохтоохторуттан өйөбүл, көмө уталытыллыбакка оҥоһуллар

Мэҥэ Хаҥалас улууһун социальнай бэлиитикэҕэ управлениетын салайааччы Оксана Кулешова улууска байыаннай сулууспалаахтарга уонна кинилэр дьиэ кэргэттэригэр өйөбүл, көмө уталытыллыбакка оҥоһулла турарын туһунан кэпсээтэ.

— РФ үрдүнэн байыаннай эпэрээссийэ биллэриллээтин кытта Мэҥэ Хаҥалас улууһугар суһал ыстаап тэриллибитэ. Ыстаап бастакы ылыммыт быһаарыытынан балаҕан ыйыттан быстах ыҥырыынан уонна 2022 сыл олунньу 24 күнүттэн баҕа өттүнэн хантараагынан сулууспалыыр саллааттарга 50 000-лыы солкуобай харчы бэриллибитэ. Билиҥҥи туругунан, барыта 8 750 000 солкуобай төлөннө.

Улуус социальнай бэлиитикэҕэ управлениетын баазатыгар гуманитарнай көмөнү хомуйарга быһа сибээс олохтоммута, оттон төлөбүрдэр уонна чэпчэтиилэр боппуруостарыгар социальнай управление хайысхатынан эмиэ быһа сибээс үлэлиир, психологическай өйөбүлгэ «СӨ Дьиэ кэргэҥҥэ уонна ыччакка социальнай-психологическай өйөбүлүн киинин» улуустааҕы салаатыгар быһа сибээс үлэлии турар. Маны сэргэ улууска «Манчаары» пуонда аһыллан, тэрилтэлэртэн уонна биирдиилээн дьонтон байыаннай эпэрээссийэҕэ сылдьар уолаттарбытыгар көмө харчы киирэр. Быстах ыҥырыы саллааттарыгар байыаннай таҥас-сап, наадалаах мал-сал атыылаһыыга тута 1 246 659,84 солк. харчы хомуллубута. Онтон ыла «Манчаары» пуондаҕа 2023 с. тохсунньу 1 күнүгэр диэри киирбит үп уопсай суумата 3 824 976,87 солкуобайга тэҥнэстэ.

Д.Ф.Ходулов аатынан НАДь тэрийиитинэн «Дойдубут туһугар» аахсыйа ыытыллыбыта. Онтон барыта 1 636 952 солк. харчы киирбитэ. Онон коптердар, саха быһахтара, сылаас таҥас, төлөпүөннэр, рациялар уо.д.а.а. атыылаһыллыбыттара. Ону таһынан сылаас таҥас, 482 киилэ отон, бородуукта, төлөпүөннэр курдук гуманитарнай көмө хомуйуллубута. 42 дьааһыктаах отон «Саха-волонтер» аһымал пуондатыгар туттарыллыбыта. Улуус дьахталларын Сүбэтэ 250 дьааһык дьиэ аһылыгын (бэрэски, чебурек, ыһаарыламмыт собо) бэлэмнээн гуманитарнай көмөнү тутар пууҥҥа туттарбыта. Аахсыйа түмүгүнэн улуус баһылыга Тихонов Д.И. салайааччылаах улуус делегацията ДНӨ тиийэн гуманитарнай көмө баһыылкаларын тиксэрбитэ. Максимов Афанасий Павлович, Сыдыкбеков Темир Абдыкалыевич улуус бэрэстэбиитэлэ буоланнар Уһук Илиҥҥэ баар 12 байыаннай чааска баар биир дойдулаахтарыгар баһыылкалары туттарбыттара.

2023 сыл тохсунньу 25 күнүнээҕи улуус баһылыгын Тихонов Д.И. дьаһалынан, байыаннайдар дьиэ кэргэттэригэр «Байыаннай эпэрээссийэ кыттыылааҕын дьиэ кэргэнин дастабырыанньата» туттарылларыгар быһаарыы тахсыбыта. Араас чэпчэтиилэри көрөр 187 дастабырыанньа буойун кэргэнигэр, оҕолоругар, төрөппүттэригэр бэрилиннэ. Улуус хас биирдии байыаннай сулууспалааҕар көрүллэр хамнас курдук төлөбүр акылаатыгар үлэ сылыгар аахсыллар ыйдааҕы эбиини олохтуурга олорбут сириттэн докумуоннары кинилэр дьиэ кэргэннэриттэн кииннээн хомуйууну тэрийэргэ быһаарыы ылыллыбыта.

Атын улуустарга курдук, улуус социальнай управлениетын сүрүннээһининэн мас, от, муус хааччыныыга, онтон да атын араас олох-дьаһах кыһалҕаларыгар барытыгар киирбит сайаапканан көмөнү тута оҥорор волонтер штаба үлэлиир. «СӨ Дьиэ кэргэҥҥэ уонна ыччакка социальнай-психологическай өйөбүлүн киинин» улуустааҕы салаатын өйөбүлүнэн психологическай сүбэлэри, көмөнү 72 дьиэ кэргэн уонна 146 биирдиилээн киһи ылла. Психологтар суох буолбут буойуну ийэ сиригэр туттарыы кэмигэр байыаннай сулууспалаах дьиэ кэргэнигэр психологическай көмөнү оҥороллор.

Маны таһынан нэһилиэнньэттэн гуманитарнай көмө быһыытынан байыаннай усулуобуйаҕа сөптөөх таҥас-сап, үрүссээк, утуйар мөһөөччүктэр, кунуопкалаах төлөпүөннэр, ичигэс таҥас, аптечка, фонарик уо.д.а. хомуйуллар. Улуус уопсастыбаннаһа, дьахталлар, ийэлэр түмсүүлэрэ өрөспүүбүлүкэ ыытар «От мам Якутии с любовью», «Мы вместе» курдук аахсыйаларга көхтөөхтүк кытталлар. Холобура, «От мам Якутии с любовью» аахсыйанан кинилэр 413 араас сылаас таҥаһы тикпиттэрэ, 547 сылаас таҥаһы хомуйаннар Дьокуускайга баар гуманитарнай көмөнү тутар пууҥҥа туттарбыттара.

Улуус баһылыга Тихонов Д.И., управлениелар, тэрилтэлэр салайааччылара байыаннай сулууспалаахтар ийэлэрин, кэргэттэрин кытта көрсүһүүлэрэ тэриллэн ыытыллыбыттара. Алтынньы ыйтан ыла 107 киһилээх телеграмм-ханаал аһыллан, байыаннайдар ийэлэрин, кэргэттэрин кытта быһа сибээс олохтоммута. Бу ханаалга баар дьонтон киирэр боппуруостары барытын улуус социальнай боппуруостарга баһылыгы солбуйааччыта Григорьева Альбина Андреевна сүрүннээн, туһааннаах көмө тута оҥоһуллар. Онон улууска байыаннайдарга, кинилэр ийэлэригэр, кэргэттэригэр, оҕолоругар өйөбүл, көмө уталытыллыбакка оҥоһуллар.