Мэҥэ Хаҥалас Сыымаҕа алтынньыга гааска холбонуоҕа

Бу сыл алтынньытыгар Мэҥэ Хаҥалас улууһун Сыымах сэлиэнньэтэ гааска холбонуоҕа. Бу туһунан СӨ баһылыга Айсен Николаев «Саха» ГТРК ханаалын «Прямой разговор» биэриитигэр иһитиннэрдэ.

«Газпром» хампаанньа уонна өрөспүүбүлүкэтээҕи былаас күүстэринэн, Мэҥэ Хаҥалас улууһун Сыымах сэлиэнньэтигэр гааһы киллэриигэ үлэ көхтөөхтүк ыытыллар. Бу бырайыак Кыайыы үбүлүөйдээх сылыгар ананар. Бу нэһилиэк саха норуотуттан бастакынан Сэбиэскэй Сойуус Дьоруойа буолбут Федор Кузьмич Попов төрөөбүт дойдутунан буолар. Билигин бырайыактыыр-симиэтэлиир докумуоннар бэлэмнэнэн бүтэн эрэллэр, судаарыстыбаннай эспэртиисэ үтүө түмүктэрдээх», — диэн Айсен Николаев эттэ.