Мэҥэ Хаҥалас улууһугар пиэрмэр Наталья Данилова саҥа хотоно үлэҕэ киирдэ

Бүгүн Мэҥэ Хаҥалас улууһугар бэлиэ күн — СӨ үтүөлээх пиэрмэрэ, тыа хаһаайыстыбатын туйгуна, үлэ бэтэрээнэ, бааһынай хаһаайыстыба салайааччыта Наталья Данилова 50 ыанар ынахха анаммыт киэҥ, үрдүк, аныгылыы оҥоһуулаах саҥа хотоно үлэҕэ киирдэ.

Бу туһунан улуус баһылыга Дмитрий Тихонов бэйэтин телеграм-ханаалыгар маннык суруйда:

— Былырыын Тыа хаһаайыстыбатын министиэристибэтин «Дьиэ кэргэн пиэрмэлэрин сайыннарыы» федеральнай тосхол гранын кыайыылааҕа буолбута.

Наталья Ивановна, Ньургустан Васильевич Даниловтар тыа хаһаайыстыбатын сайдыытыгар дьоһун кылааттарын киллэрсэр, олоххо көхтөөх, саҥаны, сонуну сэргиир, дойдубут сайдыытыгар туруулаһар улууспут үлэһит ыалларыттан биирдэстэрэ буолаллар. Даниловтар 2005 сыллаахха 2 ыанар ынаҕы, 5 борооскуну Доллу нэһилиэгиттэн аҕалан үлэлэрин саҕалаабыттара. Билигин төбөлөөҕүнэн 121 ынах сүөһүлээхтэр. Тутууну икки ый устата эдэр киһи Валентин Охлопков салайааччылаах  «Артметалл» тэрилтэ оҥордо. Тутуу кылгас кэм иһигэр хаачыстыбалаахтык оҥоһуллубутун үгүс киһи бэлиэтээтэ, ону таһынан икки сыл устата тэрилтэ көрөр-истэр, чөлүгэр түһэрэр мэктиэлээх.

Даниловтар дьиэ кэргэн сүөһү эрэ көрүүтүнэн буолбакка, нэһилиэнньэттэн үүт тутан собуоту үлэлэтэллэр, үрүҥ аһынан нэһилиэк, улууспут олохтоохторун хааччыйаллар. Ону сэргэ сир оҥоруутугар бу тосхолтон үбүлэнэн саҥа анал тиэхиньикэ — булуук, сиэйэлкэ, барана ылынан, быйыл 26 га иэннээх быраҕыллыбыт сири сөхсүтэн бурдук ыспыттара өлгөмнүк үүнэн, балаҕан ыйыгар хомуур үлэтин саҕалыахтара. Бу сайын 150 туонна оту оттоон, кыстыкка бэлэмнэр.

Улууспутугар биллэриллибит үс сыллаах тыа хаһаайыстыбатын сыллара бу сылга түмүктэниэхтэрэ. Сүрүн сорукпутунан тыа сиригэр оҥорон таһаарыы хас нэһилиэкпит ахсын баар буоларын, үлэлиир тэрилтэлэрбит, үлэһит дьоммут туруктаах буолалларын, ыччат дьон тыа сиригэр олохсуйарын ситиһии буолар. Ол үлэбит биир хайысхатынан хотоннору тутуу, быйыл 560 төбө ынах сүөһү кыстыыр сэттэ саҥа хотоно үлэҕэ киирэллэрэ күүтүллэр. Наталья Ивановна, Ньургустан Васильевич өбүгэ төрүт дьарыгын илдьэ сылдьар биир бастыҥ ыалбыт, саҥа тутуллубут хотоҥҥут сылаас эркиннээх, бөҕө-таҕа, уһун үйэлээх буоллун, үгүс ынах сүөһү иитиллэн бигэ туруктаах, толору дьоллоох ыал буолун диэн алгыспын аныыбын.

Сиһилии @dmitriytikhon0v сигэнэн ааҕыҥ.