Мэҥэ Хаҥалас улууһугар сүппүт сылгыһыты көрдөөһүн салҕанар

Дьокуускай куорат быыһааччылара Мэҥэ Хаҥалас улууһугар эр киһини көрдөөһүҥҥэ кыттыстылар. Эр киһи муус устар 30 күнүгэр сураҕа суох сүппүт. Эр киһини үөһэттэн квадрокоптерынан эмиэ көрдүүллэр.

Санаттахха, 59 саастаах эр киһи муус устар 30 күнүгэр сүппүт. Эр киһи сылгыларын көрдүү барбыт да, төннүбэтэх. Сылгы баазатыттан бастаан 20 километр кэриҥэ тэйиччи сиргэ миинэр атын булбуттар, оттон ыам ыйын 9 күнүгэр сылгыһыт ыта көстүбүт. Эр киһини көрдөөһүҥҥэ быыһааччылар, Амма уонна Чыамыйыкы сэлиэнньэтин олохтоохторо үлэлииллэр.

«Быыһааччылар күн устата сылгынан 34 километр усталаах сири аастылар. Квадрокоптеры үстэ көтүттүлэр. Үүт Ыйаабыт сылгы баазатыттан көрдүүр бөлөх Үөттээх баазатыгар көстө. Көрдүүр үлэлэр салҕаналлар», — диэн СӨ Быыһыыр сулууспатыгар иһитиннэрдилэр.