Мэҥэ Хаҥалас улууһугар XVII-XIX үйэтинээҕи туой иһиттэри буллулар

Мэҥэ Хаҥалас улууһун Хаптаҕай сэлиэнньэтин чугаһынан бөдөҥ археологическай эспэдииссийэ үлэтэ саҕаланна. Ити сиргэ Өлүөнэ күргэтэ тутуллуоҕа.

Бу туһунан СӨ култуура нэһилиэстибэтин харыстабылыгар управлениетын салайааччыта Николай Макаров бэйэтин ТГ-ханаалыгар иһитиннэрэр.

Хаһыы бастакы нэдиэлэтигэр археологтар XVII-XIX үйэтинээҕи туой иһит тобохторун — туой иһит үлтүркэйдэрин буллулар. Бу булумньу олохтоохтор олоххо-дьаһахха туттубут буолуохтарын сөптөөх. Өссө маннык булумньулар дьон тугу аһыылларын, аһы-үөлү хайдах харайалларын, ханнык технологиялары тутталларын көрдөрөр күннээҕи олох хартыынатын чөлүгэр түһэрэргэ көмөлөһөр кэриэтэ буолаллар.

Хаһыыларга учуонайдар эрэ буолбакка, устудьуоннар эмиэ кытталлар. Билиҥҥитэ Дьокуускайдааҕы художественнай училище устудьуоннара практикаларын ааһаллар – булумньулары уруһуйдууллар уонна учуонайдарга артефактары докумуоннуулларыгар көмөлөһөллөр. Археологтар Саха сирин устуоруйатыгар сүҥкэн суолталаах «Хаптаҕай сэлиэнньэтэ» диэн култуура нэһилиэстибэтин эбийиэгин үөрэтэллэр. Кылгас кэм иһигэр номнуо XVII-XIX үйэтинээҕи туой иһит тобохторо булулуннулар. Инникитин өссө сыаналаах арыйыыларга эрэл эмиэ баар.