Мэҥэ Хаҥалас улууһугар үөрэх дьылын түмүктүүр сүлүөт бастыҥнары ааттаата

Бэҕэһээ, ыам ыйын 14 күнүгэр, 2-с Наахара нэһилиэгэр Улуу Кыайыы 80, Арассыыйаҕа Аҕа дойдуну көмүскээччилэр, национальнай Дьоруой Баһылай Манчаары төрөөбүтэ 220 сылыгар анаммыт улуус үөрэнээччилэригэр үөрэх дьылын түмүктүүр сүлүөт ыытылынна.

Тэрийээччилэр — улуустааҕы үөрэҕирии салалтата, «Мэҥэ кэскилэ» улуустааҕы патриотическай иитиигэ тирэх киин, И.И. Платонов аатынан Наахара орто оскуолата итиэннэ улуустааҕы сокуоннай саастарын ситэ илик оҕолор дьыалаларын көрөр уонна кинилэр бырааптарын көмүскүүр хамыыһыйа.

Мэҥэ Хаҥалас улууһун дьаһалтатын пресс-сулууспата иһитиннэрбитинэн, тэрээһиҥҥэ 21 оскуолаттан 200-тэн тахса оҕо кыттыыны ылла. Сүлүөт түөрт хайысханан барда.  Ол курдук, дьүүллүүр сүбэ былаһаакка  киэргэтиитин, бэйэни билиһиннэриигэ оҕолор идиэйэлэрин, көхтөрүн, миэстэтигэр тэттик киинэ оҥоруутун сыаналаатылар.

Түмүккэ Гран-при үрдүк аатын Н.Д. Неустроев аатынан Бэдьимэ орто оскуолатын «Бэдьимэ кэскилэ» оҕо уопсастыбаннай түмсүүтэ ылла. Бастакы миэстэ — И.М. Романов аатынан Төхтүр орто оскуолатын «Дьаҥхаады кэскилэ» оҕо уопсастыбаннай түмсүүтэ, иккис миэстэ — М.Е. Попов аатынан Аллараа Бэстээх орто оскуолатын «Школьная республика» уонна Кеша Алексеев аатынан Хаптаҕай орто оскуолатын «Пульс» оҕо уопсастыбаннай түмсүүллэрэ, үһүс миэстэ В.П. Ларионов аатынан Майа орто оскуолатын «Ларионовцы», А.А. Пахомов аатынан Тиэлиги орто оскуолатын «Кэскил» итиэннэ И.Г. Игнатьев аатынан Хара орто оскуолатын «Ситим» оҕо уопсастыбаннай түмсүүлэрэ буоллулар.

Ардахха мэһэйдэппэккэ, оҕолор үгэскэ кубулуйбут пионерия саҕаттан ыытыллар сүлүөккэ бэрт көхтөөхтүк кыттан, айылҕалыын алтыһан, сынньанан, үөрэн-көтөн тарҕастылар.