Мэҥэ Хаҥалас улууһун баһылыга дьонун ис миининэн күндүлээтэ

Бу күннэргэ улуустар кииннэригэр үрүҥ тунах ыһыахтар түмүктэннилэр.

Дьон санаатын  суруйбутунан, «статустарыгар» бэлиэтэммиттэринэн сылыктаатахха, олус тэрээһиннээх ыһыахтар ыһыллан аастылар. Ол да буоллар, Мэҥэ Хаҥалас улууһа биллэ чорбойдо.  Улуус баһылыга Дмитрий Тихонов ардахтаах күн сып-сылаас буотарах миининэн, этинэн күндүлээн, биир дойдулаахтарын уонна ыһыах ыалдьыттарын үөртэ.

Мин нэһилиэктэр ураһалара турар сирдэрин көрө бараары, биир сиринэн быһа түһэбин диэн, улахан да улахан чааҥҥа кэтиллэ түстүм.

Ааһан иһэр дьон сылаас миин иһэн, итии киллэрэн, баһылыктарыгар Дмитрий Ивановичка махтанан аастылар.

Онон Майа Ураһалааҕар ыһыахтаабыт дьон ардахтаах күнү уйгу-быйаҥ бэлиэтин курдук ылыннылар. Мэҥэлэр, кырдьык да, Тыа хаһаайыстыбатын сылын биллэрбиттэрэ үтүө түмүгү түстээбитин, баһылык Дмитрий Тихонов күндүлээбит буотарах миинэ туоһулаата.