Мэҥэ Хаҥалас улууһун Майата сахалыы тыыннаах

Кэлиҥҥи сылларга Мэҥэ Хаҥалас улууһун Майа  сэлиэнньэтэ сахалыы тыыннаммыта харахха быраҕыллар буолла.

Улуус  баһылыга Дмитрий Тихонов кэлиҥҥи сылларга Майаҕа сахалыы моһуоннаах тутуу, элбэх мэндиэмэннээх дьиэ элбээбит төрүөтүн маннык быһаарда:

— 2007 сыллаахха улуус киинэ Майаттан Аллараа Бэстээххэ көһүүтүн саҕана кыратык “ханнык хайысханан сайдабыт?” диэн мунаахсыйан ылбыппыт. Онтон 2008 сыллаахха улуус Мунньаҕын дьокутааттарын быһаарыытынан култуура уонна духуобунас киинин быһыытынан тупсарар туһунан дьаһал ылыахпытыттан ыла, Майабыт киһи билбэт гына тубуста, духуобунай эйгэтэ сахалыы тыыннанна.

Билигин “дизайн-код”, “маастар-былаан” диэн ирдэбиллэри тутуһан, аны улууспут киинин Аллараа Бэстээҕи уонна нэһилиэктэрбитин тупсарар сорук турар. 

Бу курдук, омос көрдөххө, кыраттан саҕаламмыт курдук эрээри, туһугар, дириҥ ис хоһоонноох, бэрт суолталаах үлэ саҕаламмыт.

Уулуссалар ааттара нууччалыы суруллар, ортотугар чороон иһигэр дьиэ нүөмэрэ, ол кэнниттэн — уулусса аатын сахалыы тылбааһа.

Бу курдук дьиэ аайы суруллан турара, көрүөххэ — астык.

Сахалыы ааттаах маҕаһыыҥҥа, кафеҕа киирэртэн ордук суох.

Маҕаһыын үлэлиир кэмэ кытта сахалыы. Оскуолаттан саҕалаан, бары тэрилтэлэргэ сахалыы сурук-бичик. Бу мантан саҕаланар үүнэр көлүөнэҕэ төрөөбүт дойдуга тапталы иҥэрии.

Бэйэ бурдуга, аһа-үөлэ атыыланар лааппы манна үгүс.

Майалар бу үтүөкэннээх холобурдарын батыһар кэм кэллэ.