Мэҥэ Хаҥалас улууһун Сыымах сэлиэнньэтигэр 160-тан тахса дьиэҕэ гаас киириэҕэ

«Сахатранснефтегаз» хампаанньа Мэҥэ Хаҥалас улууһун Сыымах нэһилиэгэр гаас киириитин  боппуруоһун көрдө.

160-тан тахса олорор дьиэҕэ, алта социальнай эбийиэккэ уонна икки хочуолунайга гаас холбонуон сөп.

Ааспыт нэдиэлэҕэ «Сахатранснефтегаз» хампаанньа гааһы тарҕатар ситимнэрин управлениетын уонна бырайыактыыр үлэ салаатын үлэһиттэрэ Сыымахха тиийэннэр, нэһилиэктэр икки ардыларынааҕы уонна нэһилиэк иһинээҕи гаас ситимнэрин саҥардыыга олохтоохторго хаттаан ыйытык ыыттылар.

“Командировка түмүгүнэн, 160-тан тахса олорор дьиэҕэ, алта социальнай эбийиэккэ уонна икки хочуолунайга гааһы киллэрэр ​​кыах баара быһаарылынна. Ол сыалтан Бэдьимэттэн Сыымахха диэри 24 км уһуннаах нэһилиэктэр икки ардыларынааҕы гаас ситимэ тутуллуоҕа, ону таһынан уопсайа 13 км уһуннаах нэһилиэк иһинээҕи гаас ситимэ тардыллыаҕа», — диэн  “Сахатранснефтегаз” генеральнай дириэктэрэ Алексей Колодезников бэйэтин телеграм-ханаалыгар суруйда.

Быйыл Кыайыы 80 сыллаах үбүлүөйдээх сылыгар сахаттан бастакы Сэбиэскэй Сойуус Дьоруойа Фёдор Попов дойдутугар гаас ситимэ киириэҕэ.

2024 сыллаахха Мэҥэ Хаҥалас улууһа социальнай гаастааһыҥҥа бастыҥнар кэккэлэригэр киирбитэ. 187 дьиэ оннугар 246 дьиэ гааһынан хааччыллыбыта.