Мэҥэ Хаҥалас уонна Амма улуустара мас-рестлиҥҥэ Федерация Куубагар кыайыылаах таҕыстылар

Мэҥэ Хаҥалас уонна Амма улуустарын мадьынылара араас лиигэлэргэ мас-рестлиҥҥэ Федерация Куубагын хаһаайыттарынан буоллулар. Кинилэр былырыыҥҥы ситиһиилэрин хатылаатылар.

Федерация Куубагын Үрдүкү лиигэтигэр төрдүс сылын субуруччу Мэҥэ Хаҥалас улууһун сүүмэрдэммит хамаандата бастаата. Быһаарыылаах киирсигэ кинилэр Таатта улууһун бэрэстэбиитэллэрин кыайдылар. Таатталар түмүккэ иккис буоллулар. Боруонса мэтээли үрүҥ көмүс иһин киирсигэ таатталарга хотторон, чурапчылар ыллылар.

Бастакы лиигэҕэ киирсиилэр олус тыҥааһыннаахтык аастылар, үгүстэрэ кыра арыттаах түмүктэннилэр. Амма улууһун сүүмэрдэммит хамаандата иккис сылын субуруччу бастыҥынан таҕыста. Кинилэр утуу-субуу Үөһээ Бүлүү уонна Томпо улуустарын хамаандаларын кыайталаан, ньурбаларга хоттордулар. Бүтэһик киирсиигэ соһуччу түгэн таҕыста – аан дойдуга хотторбот чөмпүйүөнкэтэ Татьяна Баишева Ньурбаттан сылдьар Анна Саморцоваҕа 0:2 ахсаанынан хоттордо.

Эбии көрдөрүүлэринэн аммалар Бастакы лиигэҕэ Федерация Куубагын хаһаайыттарынан буоллулар. Үөһээ Бүлүү улууһа иккис миэстэни ылла, оттон Ньурба улууһа – үһүс.