Мэҥэ Хаҥалас урбаанньыттарыгар өйөбүл бэртээхэй сонун сүүрээнин тобуллулар

Мэҥэ Хаҥалас улууһунааҕы «Мин биисинэһим» киин урбаанньыттарга бырайыактары бэлэмнииргэ сонун сүүрээни тобулла.

Ол курдук, Мэҥэ Хаҥалас улууһун дьаһалтатын, «Мин биисинэһим» киин уонна улуустааҕы биисинэс-инкубатор исписэлиистэрэ урбаанньыттар бырайыактарын   СӨ Урбааҥҥа, атыыга-эргиэҥҥэ уонна туризмҥа министиэристибэтин иннигэр көмүскүөхтээх бырайыактарын үрдүк таһымнаахтык куолаан бэлэмнээн, урбаанньыттарга “далаһа ууран” биэрдилэр.  Исписэлиистэр хас да сүрүн хайысхаҕа өйөбүл буоллулар: үп-харчы докумуонун бэлэмнээһин, бырайыак сүрүн соругун сиһилии быһааран  “илдьиритии”, ырыынак бүгүҥҥү туругун анаарыы, биисинэс-былаан ымпыгын-чымпыгын торумнааһын, дохуоту уонна ороскуоту билгэлээһин,  графиканан көрдөрүүлэри холобурдааһын уо.д.а. уустук өрүттэри быһааран, сүбэлээн биэрдилэр. Онон хас биирдии бырайыак хамыыһыйа иннигэр өйдөнүмтүө, киһи болҕомтотун тардар буолалларыгар ураты болҕомто уурулунна.

Ити курдук, «Мин биисинэһим» улуустааҕы киин урбаанньыттарга араас өйөбүлү оҥороро атын улуустарга бастыҥ холобурунан буолар.