Мэҥэ-Хаҥаласка 300 тыһ. солк. тахса сыаналаах кабелы уорбуттар

Мэҥэ-Хаҥалас улууһун ИДьМ дьуһуурунай чааһыгар биир хампаанньа бэрэстэбиитэлэ, тэрилтэ тэлгэһэтиттэн биллибэт киһи 140 миэтэрэттэн тахса уһуннаах кабелы уорбутун туһунан сайабылыанньа түһэрбит.

Буруйу оҥорооччу сокуону кэһэр дьайыыларынан хампаанньаҕа 300 тыһыынча солкуобайтан тахса суумалаах хоромньуну оҥорбут. Ыытыллыбыт суһал-ирдиир дьаһаллар түмүктэригэр холуобунай ирдэбил үлэһиттэрэ атын киһи баайын-дуолун уорууга сыһыаннаах киһи ким буоларын быһаарбыттар. Уорбаланааччы 29 саастаах олохтоох киһи буолара биллибит.

Силиэстийэҕэ быһаарыллыбытынан, уорбаланааччы тэрилтэ аттынан ааһан иһэн, катушкалаах кабелы көрөн, уорарга санаммыт. Түүнүн эр киһи тэрилтэ тэлгэһэтигэр киирэн, 143 миэтэрэ кабелы уоран тахсыбыт. Буруйу оҥорооччу этэринэн, кини кабелы өҥнөөх металл тутар пуунугар туттараары гыммыт да, ситиспэтэх.

Уоруллубут былдьанна. Российскай Федерация Холуобунай Кодексатын 158-с ыстатыйатын 2 чааһынан («Уоруу») холуобунай дьыала тэрилиннэ, бу ыстатыйа санкцията 5 сылга диэри көҥүлү быһыыны көрөр. Дьыалаҕа эриллибит киһиэхэ ханна да барбат уонна бэрээдэги кэспэт туһунан хааччахтыыр миэрэ талылынна, диэн Саха сиринээҕи ИДьМ пресс-сулууспата иһитиннэрэр.